الاثنين، 17 مايو، 2010

فعلتها أمي .. لك الحمد يا رب

بجد انهارده من أسعد الأيام في حياتي

لأن أول مرة أسمع خبر يسعدني من فترة طويلة


الوالدة : ازيك يا فلان عامل ايه ؟؟
أنا : الحمد لله بخير

الوالدة : أخبار مذاكرتك ايه .. شد حيلك خلاص هانت
أنا: الحمد لله أدينا شغالين

الوالدة : حابه أقولك على حاجه
أنا : أبشري

الوالدة : انهارده انا ختمت القرآن خلاص
أنا : بجد والله طيب كويس ألف مبرووك يا أمي ده خبر جميل جدا


بس يا جماعة

فعلتها أمي بعد كفاح أكتر من 12 سنة تقريبا

بجد بقالها أكتر من 12 سنة نفسها تختم القرآن و تحفظ حد فينا القرآن

بدأت معايا من صغري والحمد لله أنجزت جزء كبير جدا بس جيت في الآخر ووقفت

وبدأت مع أختي أيضا وحفظتها القرآن كاملا ولله الحمد منذ عامين

وانهارده بفضل من الله ومن

ختمت والدتي حفظ القرآن الكريم عن ظهر قلب

بعدما عانت من مشاق ومتاعب عشان تقدر تحفظه

صحيح مش انا اللي ختمت بس حاسس بفرحتها

وقد ايه هيه كانت وكل يوم كانت بتروح المركز وفي الصيف بتاخد دورات مكثفة

وسط كل مشاغلها مع اخواتي وانشغالها بحالي ومتابعتها لوالدي وحالته الصحية

رغم كل ده مش وقفها يوم واحد عن هدفها اللي عاشت حياتها تقريبا عشانه

فعلا ينطبق عليها الشاعر حين قال

ذو الهمة ان حط تأبى نفسه إلا علوا
كالشعلة من النار يصوبها صاحبها لأسفل فتأبى الا علوا

ربنا يباركلك يا أمي في اللي عملتيه معايا ومع اخواتي من مجهودات

ويباركلك في القرآن ويجعله حافظا لكي

وفعلا بالنجاح ده وسط كل المعوقات تستحقي تكوني الأم المثالية


ربنا يبارك لما فيكي

الأحد، 9 مايو، 2010

عندما يصيبك النحس

مبيجيش في دماغي ان فيه حاجه اسمها نحس .. مش مؤمن بيه أصلا

بس بصراحة اللي حصل معايا الاسبوع اللي فات ملوش غير معنى واحد

انا منحوووووووووس

تعود الحكاية منذ اسبوعين ثلاثة

لما اكتشفت ان الجزمة مقطوعة

مكنتش أعرف الا في مرة كنت معدي على أرض عليها ماء - بحيرات الشارع المصري عارفيناها طبعا -

ولقيت رجليا راحت ميه ببص على الجزمة من تحت لقيت قطع محترم يدخل جمل .. مش هايدخل شويه ميه

المهم قلت مش قضية ونسيبت الموضوع

بعدها بأيام وانا بغسل الهدوم .. لقيت بنطلوني الحبيب مقطوع قطعه محترمة وانا مش واخد بالي خالص

بردو الموضوع مكانش في دماغي خالص .. عادي يعني ركنته وبستخدم غيره

بعدها بأيام راجع من الكلية بشغل اللاب وفتحت المنتدى وكنت بكتب موضوع في فضفضة

مرة واحدة لقيت الشاشة سوداااااااااااااااااااااااء كحل

بس الكمبيوتر شغال عادي

قفلت اللاب وفتحته تاني .. 3 دقايق بالظبط والشاشة اسودت تاني

طيب وبعدين ؟؟؟

بعد بحث اكتشفت ان شاشة اللاب اتوكلت على الله

وفي عرف اللابات التي لا تعترف بقطع الغيار لأن قطعة الغيار فيه قد تمن اللاب تقريبا

فكده اللاب كله بالسلامة

قلت بقى لازم أروح البيت أجيب جزمة وبنطلون تانيين واشوف حل للاب

بعد ما وصلت البيت بالسلامة دخلت جري على غرفتي أشوف اللاب التاني اشغله واخده معايا

وبعد معركة طويلة من الفك والتركيب وتغيير الهاردات والرامات بس ولكن المنحوس منحوس .. اللاب التاني آبى أن يعمل خالص وظل ساكنا

ادايقت جدا قلت أقوم آخد دش عشان السخونة اللي انا فيها

أدخل الحمام ألاقي الميه مقطوعة

قلبت معايا بقى ودخلت نمت

قمت الصبح أدخل الحمام مفيش مياه بردو

وبعدين بقى

قلت هانزل اشتري ميه وأمري لله

غيرت هدومي وخدت البطاقة ونزلت

لما وصلت الدكان ببص في جيبي ألاقي البطاقة اللي جبتها بطاقة والدي .. طيب ايه اللي جابها في جيبي دي

مش عارف

وقفت اشتريت اللي ربنا قدرني عليه من مياه وحاجه الواحد يفطر بيها

وآخدت الحاجات خطوتين بالظبط ولقيت الكيس اتفرتك والحاجات كلها وقعت على الأرض

بقيت واقف بخبط ايد على ايد

مش عارف ايه ده

لممت حاجياتي وروحت على البيت جري

دخلت وبعدين قلت يمكن فيه ذنب واقف في سكتي

يبقى نصل رحمنا

نزلت أزور ناس قرايبي وأخدت اللاب معايا احاول معاه

وانا عندهم قلت خلاص لازم أروح لمهندس يشوف اللابات دي - انا تعبت -

سألتهم على محل كويس .. فقالولي روح المكان الفلاني

ببص في جيبي بالظبط كان في جيبي 35 جنيه

طيب هاروح أعمل بيهم ايه دول

أدور على الفيزا كارد .. مش لاقيها

بقيت قاعد بشد في شعري

قلت خلاص مش قضية .. اروح للمهندس ولو بدأ يصلح أروح البيت اشوف الفيزا فين واجيب فلوس وارجعله

رحت للمهندس .. ملقتهووووووووووووش .. مجاش انهارده


كان حالي كده

هلكان على نفسي من الضحك




بعد ما فقت من الصدمة

مكنش قدامي حل غير حاجتين

اني اقعد أضحك


وأني انتظر ما هو القادم ؟؟؟


ببساطة شديدة أيقنت اني كده منحوس رسمي

الاثنين، 8 فبراير، 2010

أن يصبح الهدف القومي لمصر كرة تدخل في مرمى

كل سنة وحضراتكم طيبين

ويا رب أجازة سعيدة عليكم كلكم

بصراحة بكتب وانا عارف اني هلاقي هجوم شديد عليا

أحب بس أوضح نقاط في الأول

لست ضد الرياضة في كونها رياضة

والدليل قوله صلى الله عليه وسلم : (( المؤمن القوي خير وأحب إلى الله من المؤمن الضعيف ))

لست حزينا اننا كسبنا كأس أمم أفريقيا للمرة التالثة

بالعكس انا سعيد بالانجاز ده

ولكن أن يصبح الهدف القومي لمصر متعلق بكرة تدخل في مرمى !!!!!

أن يصبح انتصارنا في مباراة الجزائر هو رد اعتبار للشعب المصري !!!!!

أن يصبح الشيبان كالأطفال يرقصون ويلهون لمجرد كرة تدخل في مرمى !!!!!

أن ترقص النساء فرحا وطربا لمجرد كرة تدخل في مرمى !!!!!

أن نصيح بأخلاق الشعب المصري وبمجر ان تنتصر على الجزائر .. نرى ما رأيناه من ألفاظ دنيئة

أن نهتف بحياة المدرب وكأنه قد فتح لنا القدس واستعاد لنا المسجد الأقصى

أن نهتف باسم مصر والنجاح الساحق اللي حققته وأنها دوما أم الدنيا

والله انه ليس تقليلا لشأن ما حدث  

بس بجد اللي بيحصل ده مش معقول  

واللي يشوفنا يقول اننا جبارين في كل المجالات حتى المجال الرياضي مش سايبينه  

محدش يضحك على نفسه ويقول

هيه الحاجه الوحيدة اللي بتجمع الشعب  

اه هيه اللي بتجمعه .. بس غلط

هيه الحاجه الوحيدة اللي بتفرح الشعب  

اه هيه اللي بتفرحه .. بس غلط

لأنها بقت وسيلة هرب

بقت استسلام للواقع اللي احنا عايشينه

انا نفسي أفهم يعني ايه كلمة (( رد اعتبار ))  

يعني ايه واحد يضربني في الشارع ويدغدغني .. أقوم أنا أرجع أفوز عليه في لعبة وأقول ده رد اعتبار

بشبهها باتنين زملاء في الكلية مثلا

واحد ضرب التاني واداله علقة محترمة .. يقوم التاني يرجع ويقعد يذاكر كويس عشان ينجح ويجيب تقدير أعلى منه

عشان يقوله انه مكنش يستاهل التقدير اللي أخده !!!!!!!!!!

ايه علاقة ده بده ؟؟ انا مش عارف

ازاي ده يعتبر أحسن رد اعتبار لينا

واحنا اتخذلنا من حكومتنا اللي مجابتش حقنا

سامعك يا اللي بتقولي .. احنا اخوة وعرب ولعن الله من أيقظ الفتنة

أخي الحبيب

أذكرك بموقف سيدنا أبي ذر الغفاري رضي الله عنه عندما عير سيدنا بلال وقال له يا ابن السوداء

والى آخر الموقف اللي كلنا عارفينه

دول صحابة يعني مش هنلاقي وجه مقارنة بينا وبينهم

بس ده ممعنش ان المخطأ يحاسب بالرغم من انهم صحابة

وعدوة لحديثنا

احنا نسينا ولا بنتناسى ؟؟

احنا نسينا وضع بلدنا .. ولا بنحاول نتناسى ؟؟

احنا نسينا اننا اتهنا واتبهدلنا .. وحكومتنا حتى لم تحرك ساكننا ؟؟

مشكلتنا لم تصبح مع الجزائر .. مشكلتنا أصبحت مع حكومتنا للأسف 

مشكلتنا بقت مع أنفسنا وهروبنا من الواقع .. ونعلق آمالنا بكرة تدخل في مرمى

في النهاية

هي دعوة لأن نضع الأمور في موازينها الصحيحة دعوة لأن تأخذ الكرة منا ما تستحق والا تطغى وأن تأخد أكبر من حجمها

هي دعوة لأن نتقن كل منا عمله كما أتقن حسن شحاتة عمله

هي دعوة للالتزام الصحيح والحياة النظيفة كما استحقها بجدارة أحمد فتحي

هي دعوة بألا ننسنى من كان له أكبر الأثر على حياتنا كما نسينا أبو تريكة وأثره على المنتخب

هي دعوة بأن نتشارك ونتعاون ونعرف أن يد الله مع الجماعة كما كانت ظاهرة في المنتخب


الأحد، 3 يناير، 2010

وقفة مع سورة العصر

وزي ما سيادتكم شايفين العنوان
هانقف شويه مع سورة العصر
سورة مكية من 3 آيات بنختم بيها مجالسنا
أهم حاجه اننا هانقيم الحجة على نفسنا
فاللي مش هاياخد بالكلام اللي هانتفق عليه
يطلع بدل ما يقيم الحجة على نفسه

هوه بداية الموضوع اني كنت انا وزميل  لي بنتكلم في موضوع وتطرقنا لسورة العصر واتكلمنا فيها كتير

وحبا لكم أحببت أن أنقل هذا الخير لكم

سورة العصر بالرغم من قصرها واستسهالنا لها واحنا بنقولها لازم دوما نتلغبط

هيه تواصوا بالحق الأول ولا تواصوا بالصبر أولا :d
الا انها بليغة جدا جدا جدا وترد على ناس كثيرة جدا في كثير من المواقف

أولها قسم بالعصر وتشمل تعميما وأربع استشناءات من التعميم

فمع بعض كده ان شاء الله 

القسم هو قسم بالعصر .. وطبعا عايزين نعرف يعني ايه قسم .. نقدر بسرعة نتخيل نفسنا مع أصحابنا وانته بتحلفلهم ان والله حصل كذا وكذا .. يعني تأكيد تأكيد تأكيد

التعميم .. هو تعميم بأن الانسان دوما لفي خسر .. وقال الانسان .. يعني يشمل اللي بلا ملة والمسيحي والمسلم وكله .. ايه ده حتى المسلم ؟؟
اه حتى المسلم


الاستثناءات أربعة لا تتجزأ من بعضها البعض

اولا الذين آمنوا .. ولم يقل الذين أسلموا .. فالايمان درجة أرفع من الاسلام

ثانيا وعملوا الصالحات .. وطبعا لأن الذين آمنوا لوحدهم مش هايكفي .. لأنه مؤمن ولا يعمل .. فماذا يفيده ايمانه ؟؟ كأنه هباءا منثورا
طبعا لو قلنا الذين آمنوا وعملوا الصالحات مش كفاية !!
هاقولك لا طبعا ستظل في خسارة عظيمة وأكبر دليل على ذلك عابد الصومعة .. اللي ربنا أول ما أمر الملك أن يهلك القرية التي يقنط بها لكفرها وجحودها بالله .. فلما قال الملك لله : ان فيها عبدك الصالح .. قال فبه فابدأ .. لأنه كان من الفئة التي آمنت وعملت الصالحات وبس

ثالثا وتواصوا بالحق .. والمقصود بالحق هنا الخير كله عملا واعتقادا .. فالتزامك لوحدك لا يكفي .. فأين تواصيك بالحق مع اخوانك ؟؟

رابعا وتواصوا بالصبر .. أولا لم ذكر الصبر بعد الحق ؟؟ أوليس الصبر يكون على شئ محدد ؟؟
فهنا الصبر سيكون على الحق فالتواصي أولا على الحق وبعدها على الصبر على المعاصي بعدا عنها وعلى الطاعات تنفيذا لها وعلى البلاء الناتج من تواصيك بالحق لأن الطريق ده مش محفوف بالورود والازهار .. دوما محفوف بالمكاره .. فاستعد له وجهز عدتك قبل ان تسلك الطريق

وهنا أرى أن سورة العصر لخصت الكثير والكثير في ثلاث آيات بليغات .. تستحق ان تكون ختاما لمجالسنا .. لتذكرنا .. هل هذا المجلس لنا أم علينا .. هل كان خسارة .. أم كان فائزا


فيا ريت بقى كده بعد ما عرفنا .. ان نلتزم بما عرفنا .. وأن تكون سورة العصر نصب أعيننا سواءا في حياتنا عموما

طبعا لو حد عنده خاطره عنده تعليق حد مش عاجبه الكلام 
انا منتظر كل تعليقاتكم وخواطركم وملاحظاتكم
عشان تعرفوا بس اني راجل ديموقراطي ( اسمايل واحد حاطط سكينة على رقبته ) :d


الخميس، 3 ديسمبر، 2009

يا ترى نجحوا فعلا !!!

حاجه غريبة جدا حصلت معايا امبارح

كنت امبارح رايح أزور ناس قرايبي

ناس طيبة جدا .. لا ليها ولا عليها .. في حالهم جدا

ولكن الغريب بقى

انا كنت واخد معايا مصاصات

فواحد فيهم بعد ما أخدها

لقيته جاي وزعلان وبيقول متجيبوش من المصاصات دي تاني

دي مصنوعة في الجزائر

انا في ثواني كان عندي مليون علامة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

اشمعنه الجزائر دلوقت هانقطعها

طيب ومقاطعة البضائع الأمريكية والصهيونية

كنا كل منتكلم في المقاطعة تكون الردود

يا عم واحنا مالنا .. الفلسطينين همه اللي باعوا أرضهم

ويوم ما نتزنق خالص .. يا عم وهل المقاطعة هاتفيد أصلا

يعني الجنيه ولا الاتنين دول همه اللي هايوقفوا القتل في فلسطين

ساعتها بس قلت سبحان الله

اشمعنى يوم ما الجزائر عملت اللي عملته هنبدأ نقاطع

وبعدين ده على أساس ان الحكومة المبجلة خدت موقف مع الجزائر

احنا اضربنا واتبهدلنا والحكومة ولا عملت أي حاجه

يعني لو افترضنا ان الفلسطينين فعلا باعوا أرضهم .. محنا مش زودنا عنهم حاجه :(:(

طيب يا ترى هل مقاطعة الجزائر فعلا في مصاصة هيه اللي هاتفيد وهتأثر !!!!

ولا هيه قضية مبدأ قلبا وقالبا ؟؟؟؟!!!!!!

ولا نقدر نقول ان الاستعمار فعلا نجح في تفرقتنا كمسلمين

وبقينا مصري وسوداني وجزائري وسعودي ويمني .... إلخ إلخ

ولا نسينا بكل سهولة بيت الشعر القائل

(( أبي الإسلام لا أبا لي سواه .. إن افتخروا بقيس أو تميم ))

وبقى كل واحد همه على نفسه وبس وملوش دعوة بغيره !!!!!!!!!!!!!!

يا ترى ايه فيهم ؟؟

وانتوا ايه رأيكم في كل ده
منتظر آرائكم

الاثنين، 28 سبتمبر، 2009

خلاص وانتهى كل شئ

مممممممممممم
نبدأ منين ونقول ايه وعشان ايه
بصراحة مش عارف
يمكن مش لاقي مكان اتكلم فيه واصرخ
بس يمكن مفيش غير هنا اللي ممكن اتكلم فيه
في الوقت الحالي
خلص رمضان
كمان خلص العيد
وكمان انا خلصت وخلصت على نفسي بايدي
بس رمضان لما خلص هايرجع تاني
وكمان العيد هايرجع بردو تاني
بس يا ترى انا هاقدر أرجع ولا هافضل كده
طيب ازاي وليه وعشان مين ؟؟
يمكن اكون خلصت على نفسي وانا متماسك جدا
بس دلوقت انا مش قادر خلاص
لا نوم عارف انام ولا حتى صحيان عارف اصحى
ولا عارف انجز اي حاجه
بجد بجد شعور سئ أول مرة أحسه :(:(

الثلاثاء، 1 سبتمبر، 2009

طوابير ورايا في كل مكان


كنت في عمرة من يومين بالظبط
فكنت مع واحد صاحبي وطالعين من الحرم
ابص لقيت الصورة اللي فوق دي
طابور .. مصدقتش نفسي
كنت فاكر نفسي بحلم ورجعت مصر تاني
وطابور العيش والكلام ده
بس طلع انه فعلا طابور
طابور زمزم في مكة تقريبا 30 متر أو يزيد
فقلت من بلد لبلد وطوابير وراك في كل مكان
ويا قلبي لا تحزن
بس على فكرة انا مش بقول كده
عشان أقول ايه الفرق ما بين مصر وغيرها
لأن فيه فرق ويمكن مفيش مقارنة ما بين الاتنين أصلا