يا ترى نجحوا فعلا !!!

حاجه غريبة جدا حصلت معايا امبارح

كنت امبارح رايح أزور ناس قرايبي

ناس طيبة جدا .. لا ليها ولا عليها .. في حالهم جدا

ولكن الغريب بقى

انا كنت واخد معايا مصاصات

فواحد فيهم بعد ما أخدها

لقيته جاي وزعلان وبيقول متجيبوش من المصاصات دي تاني

دي مصنوعة في الجزائر

انا في ثواني كان عندي مليون علامة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

اشمعنه الجزائر دلوقت هانقطعها

طيب ومقاطعة البضائع الأمريكية والصهيونية

كنا كل منتكلم في المقاطعة تكون الردود

يا عم واحنا مالنا .. الفلسطينين همه اللي باعوا أرضهم

ويوم ما نتزنق خالص .. يا عم وهل المقاطعة هاتفيد أصلا

يعني الجنيه ولا الاتنين دول همه اللي هايوقفوا القتل في فلسطين

ساعتها بس قلت سبحان الله

اشمعنى يوم ما الجزائر عملت اللي عملته هنبدأ نقاطع

وبعدين ده على أساس ان الحكومة المبجلة خدت موقف مع الجزائر

احنا اضربنا واتبهدلنا والحكومة ولا عملت أي حاجه

يعني لو افترضنا ان الفلسطينين فعلا باعوا أرضهم .. محنا مش زودنا عنهم حاجه :(:(

طيب يا ترى هل مقاطعة الجزائر فعلا في مصاصة هيه اللي هاتفيد وهتأثر !!!!

ولا هيه قضية مبدأ قلبا وقالبا ؟؟؟؟!!!!!!

ولا نقدر نقول ان الاستعمار فعلا نجح في تفرقتنا كمسلمين

وبقينا مصري وسوداني وجزائري وسعودي ويمني .... إلخ إلخ

ولا نسينا بكل سهولة بيت الشعر القائل

(( أبي الإسلام لا أبا لي سواه .. إن افتخروا بقيس أو تميم ))

وبقى كل واحد همه على نفسه وبس وملوش دعوة بغيره !!!!!!!!!!!!!!

يا ترى ايه فيهم ؟؟

وانتوا ايه رأيكم في كل ده

منتظر آرائكم

خلاص وانتهى كل شئ

مممممممممممم

نبدأ منين ونقول ايه وعشان ايه

بصراحة مش عارف

يمكن مش لاقي مكان اتكلم فيه واصرخ

بس يمكن مفيش غير هنا اللي ممكن اتكلم فيه

في الوقت الحالي

خلص رمضان

كمان خلص العيد

وكمان انا خلصت وخلصت على نفسي بايدي

بس رمضان لما خلص هايرجع تاني

وكمان العيد هايرجع بردو تاني

بس يا ترى انا هاقدر أرجع ولا هافضل كده

طيب ازاي وليه وعشان مين ؟؟

يمكن اكون خلصت على نفسي وانا متماسك جدا

بس دلوقت انا مش قادر خلاص

لا نوم عارف انام ولا حتى صحيان عارف اصحى

ولا عارف انجز اي حاجه

بجد بجد شعور سئ أول مرة أحسه :(:(

طوابير ورايا في كل مكان

كنت في عمرة من يومين بالظبط

فكنت مع واحد صاحبي وطالعين من الحرم

ابص لقيت الصورة اللي فوق دي

طابور .. مصدقتش نفسي

كنت فاكر نفسي بحلم ورجعت مصر تاني

وطابور العيش والكلام ده

بس طلع انه فعلا طابور

طابور زمزم في مكة تقريبا 30 متر أو يزيد

فقلت من بلد لبلد وطوابير وراك في كل مكان

ويا قلبي لا تحزن

بس على فكرة انا مش بقول كده

عشان أقول ايه الفرق ما بين مصر وغيرها

لأن فيه فرق ويمكن مفيش مقارنة ما بين الاتنين أصلا

والله ما نسينا والله ما نسينا الخولي حبيبنا وروح عنينا

والله ما نسينا والله ما نسينا

الخولي حبيبنا وروح عنينا

كلمات أكتبها وكلي ألم

وآه من تلك آلام

إنها ليست آلام مريض

ولا آلام متوجع

انها آلام الفراق

وليس كأي فراق

انه ليه فراق والد ولا والدة

انه فراق الأب والأخ والزميل والأستاذ

انه فراق معلمي الأول

فراق من علمني كيف أسير

فراق من علمني كيف أتكلم

فراق من عملني كيف أقف

فراق أستاذي الفاضل ومعلمي الأول

محمد الخولي

فها قد مر العام الثاني

مر العام الثاني على فراقك لنا يا أستاذنا

مر عام آخر ازددنا لك فيه شوقا

ازددنا شوقا لتلك الابتسامة الجميلة

ازددنا شوقا لتلك الطلة الرائعة

ازددنا شوقا لصدرك الرحب

ازددنا شوقا لك أستاذنا

ازددنا شوقا لعباراتك وكلماتك

ازددنا شوقا لنصائحك

ازددنا شوقا للقاءاتنا

ازددنا شوقا لخروجاتنا سويا

ازددنا شوقا للعبنا سويا

ازددنا شوقا لك يا أستاذنا

أستاذي وأخي الأكبر

كم افتقدك حقا !!!!

كم افتقدك أخا وأستاذا !!!!

كم افتقد نصائحك حقا !!!!

كم افتقد الحديث معك !!!!

حقا .. أفتقدك

لا أجد كلمات أعبر بها عن ألمي

وها نحن في ذكرى وفاتك الثانية

حقا لا أجد ما أقول

غير إني أشهدك وأشهد الله وأشهد هؤلاء الناس

أني أحبك في الله

لا أجد غير هذه الكلمة أقولها

وأسأل الله العظيم رب العرش الكريم

أن يرحمك ويغفر لك ويرزقك الفردوس الأعلى


اللهم آمين اللهم آمين اللهم آمين

ابنك المحب

طاهر فور الله

غنوا معايا وقولوا ورايا

يااااااااااااه

أخيرا وبعد طول انتظار

من شهر 4 اللي فات واحنا شغالين امتحانات

ولسه مخلص امبارح

حاجه تخنق

بجد وصلت الفترة الأخيرة .. إني مش عارف انا بقرأ ايه وليه وازاي :(:(

بس الحمد لله .. خلصنا خلاااااااااااااااااص

او نقدر نقول خلصنا :d

21-6

كان نفسي أدخل واكتب بوست

كان نفسي أصرخ هنا

واقووووووووووووووول

انا كملت 20 سنة

مش فرحان ومش زعلان

بس انا كملت عشرين سنة

يمكن أحلى حاجه في اليوم ده

ان قمت من النوم ببص على الموبايل

لقيت رسائل من بابا وماما واخواتي

كلهم بيقولولي كل سنة وانته طيب

بجد كانت أجمل حاجه في اليوم ده

يلا .. بقى .. غنوا معايا وقولوا ورايا

كل سنة وطيب أنا :d

_________

كملت 20 سنة

ونقول وبعدين ؟؟!!

لفين وأين ولماذا وكيف ؟؟!!

يمكن الأسئلة دي تفسر لناس كتير حالة السكون اللي أنا فيها

مبقتش عارف ومش عارف هل هاعرف ولا لأ

يمكن أكون مصدوم في ناس كتير حواليا

يمكن أكون مخنوق من المذاكرة

يمكن أكون اتخنق من المووووووود اللي أنا فيه

بس خلاص قررت

قررت أدور على اجابات لكل علامات الاستفهام اللي عندي

قررت إني أوصل لاجابة شافية

انا دلوقت في حالة حجر نفسي ومعنوي

قافل الموبايل .. مش بدخل على النت إلا نادرا

قاعد في البيت .. قافله عليا .. مش بطلع غير للصلاة

قاعد بفكر ... بدور ... ويا رب أوصل المرة دي لاجابة

ممكن تدعولي

لأ .. هاتدعوا .. بلطجة بقى :d

كمان الفترة اللي فاتت كنت في وعكة صحية

كنت مستخبي في الشقة مش بطلع غير للامتحان وبس

كان عندي انفلونزا :d

بس اطمنوا مش خنازير .. فكنت قاعد مستكن مش ناقص مشاكل

عايز أخلص امتحانات الاول

وبعدين نبقى نشوف الخنازير ولا الأحصنة

عندي كلااااااااااام كتير أوي

عايز أتكلم في حاجات كتير حصلت في الفترة اللي فاتت

بس خلوها المرة الجاية

ونقووووووووووول

انتظرووووووووووونا

قدر الله وما شاء فعل .. لعله خير

انهارده يوم تاريخي

لازم يتسجل في المدونة

مش عشان لقاء مصر والبرازيل

لأ لأ لأ لأ .. يا برازيل مين ومصر مين :(:(

انهارده كان عندي امتحان

وانا معرفش

كنت فاكر الامتحان بكره .. وعامل حسابي على كده

ومظبط نفسي على كده

فوجئت باصحابي بيتصلوا عليا وبيسألوا انا فين ؟؟

قلتلهم في البيت وبكل برود

طيب انته مش عندك امتحان

يا عم انا امتحاني بكرة مش انهارده

يا بني سكشنك كله هنا .. قوم يلا تعالى بسرعة

قومت فين بانطلونك فين قميصك

فين الجزمة فين الشراااااااااااب ؟؟

في خلال نصف ساعة كنت في الكلية

دخلت .. الدكتورة قلبت الدنيا .. فين ده ؟؟

رحت طبعا .. قلبي في رجلي

مش مراجع المادة أصلا .. يعني كله في البطيخ
كمان لقيت اسمي مع دكتورة صعبة شويه في اسئلتها على حسب اقوال العيال اللي دخلولها

دخلت عليها .. انته كنت فين ؟؟

رديت عليها .. قلتلها بصراحة راحت عليا نومة

الدكتورة : عذر أقبح من ذنب .. بس عشان أمانتك بس .. هامتحنك

انا : في سري طبعا (( الحمد لله تكرمت وتعطفت عليا :d ))

الدكتورة : اسحب ورقة من دول .. وانته وحظك زي ما يطلعلك من الشباتر

بسم الله الرحمن الرحيم وسحبت الورقة

بدأت تسألني في شبتر .. سبحانك ربي

انا مكنتش مراجع المادة من ساعة النظري

وطبعا من الخضو والمقلب اللي أخدته .. انا فعلا كنت في الضياع

هوه فيه كم شابتر واحد صاحبي وقف معايا .. وبدأ يراجعهم معايا

الشباتر ده كان واحد منهم

فانا بدأت اجاوب .. وهيه تسأل وانا اجاوب

لغاية ما جت زنقتني في سؤال :(:( معرفتش اجابتك

وكنت عايز أقولها مش موجود في الكتاب .. بس قولت خليك ساكت

طلعت بقولهم بره .. قالولي مش موجود في الكتاب .. هيه جابت آخرها معاك بس

بس .. ده اللي حصل .. قدر الله وما شاء فعل
الحمد لله انها جات على قد كده .. الحمد لله

وصلني تاااااااااااااااج والمفروض أحل :)

تاج وصلني من كام يوم ولسه شايفه انهارده

من بنت أبيها .. صاحبة مدونة ظبط دماغك

روح يلا هنا ظبط دماغك تظابيط في تظابيط

اللينك أهوه

http://tazabit.blogspot.com/

نبدأ باسم الله مستعينين

من أنت ؟

لست إلا شاب قد احتار مما يدور حوله

لم يجد من يفهمه ولم يجد من يحس به

فقرر أن يهمس في هذا المكان بما يدور في داخله

وما الذى تفعله هنا؟

بحاول أهمس بكل ما يدور بداخلي .. أطلع الكبت اللي جوايا

اللي مش لاقي حد يفهمني .. ولا يحس بيا .. فبطلعه هنا

على الأقل ان لم أجد من يفهمني .. أكون طلعت اللي جوايا

إسرائيل تقصف كل جنوب ممكن بحثا عنك ، أى شمال ستقصد؟

والله ده شرف انها تبحث عني .. لأنها لا تقصف إلا أعدائها

ولا يوجد عدو لهم غير المسلمين .. فهو لشرف وأمنية

سأقصد شمال الشهادة بعد أن أبذل ما بوسعي في جنوب المعركة

أنت مكلف بحذف حرف من حروف اللغة العربية .. أيها ستختار ولماذا ؟

أحذف ؟؟ .. لماذا !!

هي هكذا .. أريدها زي ما هيه كلها على بعضها

لو قدر لك أن تدخل السجن فما هي القضية التي تتمنى ان تدخل بها إليه؟

سياسي

بالمناسبة.. منذ متى اكتشفت نفسك؟

ومين قال اني لسه اكتشفتها

نفسي دي شئ عجيب ..

كل يوم أكتشف مميزات وعيوب

فانا كل يوم في اكتشاف مع نفسي

على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

مفيش طريق في النص :d

ان شاء الله سأسلك طريق حلمي

نحن لا نعيش حياتنا بل نتعلم فيها كيف نعيش ما تعليقك؟

اعترض

احتاج كليهما

أعيش حياتي في أحيان

أتعلم فيها كيف أعيش

كل وله حين

بجملة واحدة فقط أكتب تعريفاً لكل كلمة من الكلمات التالية:

الوطن

تراب ما ولدت ولا تربيت عليه .. ولكن علمني الإسلام كيف أحبه

الأم

شئ عظيم .. مقصر في حقها .. أسأل ربي أن ترضى عني

الليل

مساحة هدوء للتفكير للرومانسية للسكون

الحب

يقلب الكيان .. أجمل إحساس في الدنيا

أمريكا

مثال للديكتاتورية

المرأة

نصف الرجل الآخر .. ورئيس وزراءه ورأس ماله

الصمت

حياتي

الانترنت

عائلتي

أخترمنصباً واتخذ قرارا ؟؟

رئيس الجمهورية

ودي محتاجة 7000 قرار مش قرار واحد :)

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

شايف السؤال جزئين

هل ليه همه مش بيقولوا شعر يتغزلوا في الرجال !!

فالمرأة قد خلقت لكي تسمع غزل الرجل لها

فتعبيرها عن الحب لا يكون بالكلام .. فهو بالفعل

بعكش الرجل الذي يكون تعبيره بالكلام أقوى من الفعل

أما لو جزئية العمل واشمعنه الرجل هو من كان يعمل !!

فأظن انها صفات جاهلية أكثر منها أي شئ آخر

إلى أين تمضي كلمات الحب .. بعد أن نقولها؟

أكيد إلى المرسل إليه :d

وما خرج من القلب عالطول للقلب

هل تجد علاقة بشكل أو بآخر بين المرأة وقطاع الطرق ؟

( اسمايل واحد مستغرب مش فاهم السؤال )

ايه علاقة المرآة بقطاع الطرق ؟؟!!

هذا فراق بيني وبينك .. متى ولمن تقولها ؟

آخر الطرق التي أسلكها

عندما يطفح الكيل

كيف هو غداً ؟

ازاي يعني ؟؟!!

طقس ولا مذاكرة ولا ايه ؟؟

عموما بكره مش بتاعنا ده بتاع ربنا

ولو نعرف كيف هو غدا ؟؟ كان زماني مستريح

هانمرر التاج لمييييين ؟؟

لشيكو صاحبة مدونة لحظات حياة

http://la7zat-7ayah.blogspot.com/

لأبو أنوس صاحب مدونة خاوطري

http://mykhawater.blogspot.com/

دوديلوما صاحب مدونة مجرد بنت

http://dodiloma.blogspot.com/

سمسمة صاحبة أحلام وردية

http://a7lam-wardeya.blogspot.com/

عمار صاحب لعسان مشخبط زي الفل :d

http://lasa3an.blogspot.com/

بس كده .. بس همه يحلوا

كل الأسئلة إجباري والتصحيح انا اللي هاصحح :)

انا لله وانا اليه راجعون

خيرت الشاطر بعد صلاة الجنازة

الشاطر متقبلا التعازي في والدته
الشاطر أمام جثمان والدته
الشاطر إماما للمصلين

خروج الجثمان الطاهر بعد أداء صلاة الجنازة

________________

إنا لله وإنا اليه راجعون

بقلوب ملؤها الرضى

ملؤها الحزن لفراق والدة المهندس خيرت الشاطر

لكن ملؤها الفرح والثقة بالله بأنها إنتقلت إلى جوار من هو أرحم به منه

إنتقلت إلى الرفيق الأعلى

اللهم إرحم جدتنا ,, وأغفر لها ,, ووسع لها في قبرها ,, وأسكنها فسيح جناتك ياحي ياقيوم ياأكرم الاكرمين

اللهم ديارك خيرٌ من ديار الدنيا ومافيها ورحمتك بعبادك ملئت السموات والأرض ومابينهن .

اللهم هذا ضيفك فأكرمه بكرمك يا أكرم الأكرمين وأجود الأجودين .

اللهم بكرمك ومنك وعفوك وسعة عطائك اجعلها من أصحاب الفردوس الأعلى.

اللهم أسعدها بدخول جنات النعيم واجعلها في أعلى مراتب الجنان .

اللهم أبدلها بدار خير من داره .

اللهم صبر أهلها وعظم أجرهم وأحسن عزائهم

اللهم آمين

ونتقدم بخالص التعازي للمهندس خيرت الشاطر وعائلته الكريمة وآل الصباغ

ولا ننسى أن نشيد بموقف السيد وزير الداخلية : السيد حبيب العادلي

بموافقته خروج المهندس خيرت الشاطر المعتقل على خلفية المحاكمات العسكرية الأخيرة

من المعتقل .. وحضور جنازة والدته وتقبل التعازي

فجزاه الله عنا كل خير

إنا لله وإنا إليه راجعون

طواااااااااااااااااااااااارئ

ازيكم ؟؟

عاملين ايه ؟؟

انا داخل انهارده بس أكتب بوست عشان خاطر اتنين بصراحة

الأخت شيكو بعد طلبها لبوست جديد

بس ده آخر واحد :( .. استنوا بعد الامتحاناات عليكم خير

والأخت (مسلمة وكلي فخر) اللي منورة المدونة بتواجدها

أهلا وسهلا بيكي يا فندم

بصراحة انا ماليش مزاج أكتب خالص .. كفاية كتابة في المذاكرة

بس عشان خاطر الناس دي هاكتب واقول

عن

حالة الطوارئ اللي كل بيت في مصر بدأ فيها

امتحانات بقى وكده

وانتوا عارفين طبعا اللي فيها

بتحس المعلومات كلها داخله في بعض

مش طايق كلمه من حد

قاعد واقف نايم راقد ماسك الكتاب

بعكس العادة طبعا

وكمان بتسهر ع الكتاب

ما شاء الله ع الهمة العالية

كانت فين دي طول الترم ؟؟

متعرفوش .. ولا انا اعرف

انا بجد بستغرب طول الترم مش عارفين نفتح الكتاب

بس قبل الامتحان بنعرف

مش قادر أفهم السر خالص :(:(

المهم بقى وتلاقينا نايمين صاحيين ع الكتاب

بلف في الشقة هنا وهناك

معلنا حالة الطوارئ القصوى

أكيد كلنا له جولات وصولات مع المذاكرة

مثلا

تلاقيني زي اختنا دي

قاعد بتفكر هاتعمل ايه في الأجازة

وهاعمل كذاو كذا وكذا ويا ربي ع الحماسة

وما أن تأتي الأجازة حتى تصبح الأهداف في الهوا الطاير

وطبعا بقضيها مأنتخ في السرير طول الأجازة

موقف تاني

انته عامل رعب عظيم للبيت كله

وشوف أخوك عامل ازاي .. وهوه جاي يكلمك

خااااااااااااااايف يا حبة عيني

اخويا خايف يكلمني

وخايف أوي من ردة فعلي

رغم ان الغلبان جاي يقولي يلا .. حطينا الغدا

تعالى عشان تتغدى :d

طبعا مش عايز أقولكم عن المذاكرة اللي مقطعا بعضها

بتفتح الكتب وتعمل زي أخينا ده

عالم يا ولاد بيشوف المنهج

أول مرة طبعا تشوف شكل الكتاب

كل حاجه غريبة .. مش قادر تفهم هوه في ايه في الدنيا بالظبط

الكتاب نظيف .. انته مش عارف هوه فيه ايه

لدرجة انك ممكن تمسك الكتاب بالشقلوب

وطبعا زي ما ليلة العيد بتآنسنا

ونقولها يا ليلة العيد آنسيتنا وشرفتينا

بتبقى بقى يا ليلة الامتحان آنستينا

وطبعا بيبقى الحال زي أخونا ده

يا لهووووووووووووووووووووي كل ده لسه مخلصش

وطبعا ايدك ع خدك ومش عارف تعمل ايه ؟؟

المنهج طويل والمتبقى كثير والليل بيبقى قصير ع عكس عادته

طبعا الواحد مش بيبقى عارف يعمل ايه !!

فبيضطر آسفا لآخر خطوط الدفاع

ألا وهي

من طلب العلا نام الليالي وشد اللحاف وقال انا مالي

وتصبحوا ع خير

4-15 عام منذ المحاكمات العسكرية

4-15

يا ترى ده يفكرنا بايه ؟؟

انا عارف اني لسه حاطط بوست امبارح

بس مينفعش أعدي اليوم ده من غير ما اسجله عندي

من غير ما اكتب عنه

4-15

قلنا عليه يوم لن ينساه التاريخ

يوم أن نطق هذا النظام الفاسد

الحكم بالسجن بين الـ 3 سنوات والـ 7 سنوات

ع اخواننا في المحاكمات العسكرية

ها قد مر عام 

وسيمر الباقي 

ولكن السؤال الأول يقول 

انته كنت فاكر ؟؟

هل كنت تتذكر اخوانك يوميا ؟؟

هل نسيتهم يوما من دعائك ؟؟

انا عن نفسي نسيت

وصدمت عندما فتحت موقع اخوان اون لاين ولقيت الصفحة سوداء

وبعدين اكتشفت انه قد مر عام

رجعت بالذاكرة للوراء ... ياااااه السنة عدت بسرعة كده

السنة اللي فاتت زي انهارده 

كنا غضبانين غضب

كنا زعلانين جدا

يا ترى هوه احنا بنتفاعل مع اللحظة بس ؟؟

ولا ايه ؟؟

السؤال الثاني بقى 

حتى متى هذا الظلم والاستبداد

لغاية امتى الأشراف في السجون 

والظلمة والحرامية يعتلون أعلى المناصب


لغاية امتى بس ؟؟


السؤال الأخير 

هوه هناك أمل في التغيير في مصر ؟؟

هل فيه أمل ولا ايه ؟؟

لو فيه أي بشرى يا ريت حد يبشرني




معلهش طولت عليكم ،،

الحقيقة المرة وراء زيادة المصاريف الدراسية !!!

قد يكون البعض تسائل لماذا زادت المصاريف

وقد يقول الآخر .. طب ما انا بكع فلوس من أول السنة جات ع المصاريف 

والبعض الآخر يستهون بالنصف جنيه .. ودفعه وخلاص .. مش هاتفرق معايا حاجه


طيب .. محدش سأل نفسه ليه المصاريف تزيد ؟؟

معلهش يعني .. هوه فين مجانية التعليم ؟؟

ما الحكومة مش هاتصرف علينا .. طيب ماشي يا جميل 

ليه بقى بيقولوا ان التعليم مجاني ؟؟ ما يقولوا ان التعليم بفلوس 


فين بقى اللي احنا بنستهلكه عشان ندفع فلوسه ؟؟

احنا لا بناخد كتب مجانية

ولا حتى بناخد ادوات من الكلية

ولا المواد

ولا حتى المرضى الكلية بتتكلف بمصاريفهم  

ولا حتى عارفين نمارس أي نشاط في الكلية 

فين بقى اللي استهلكناه من الكلية ؟؟ عشان ندفع مصاريفه ؟؟




وبكل آسف زادت المصاريف .. وبكل أسف بردو .. الناس راحت تدفع 

وانا أولهم .. ومحدش يقولي طيب جاي تتكلم ليه ؟؟

هاقوله اني لو أضمن ان مفيش راجل في الكلية هايدفع الزيادة دي 

لكنت أول المحرضين ع الامتناع عن الدفع 

ولكن للآسف السلبية بداخلنا مش راضيه تفارقنا 

وهتلاقي واحد ورا التاني يقول طيب وهوه النصف هايفرق ايه 

يلا يا عم .. شوف مصلحتك والكلام الفاضي ده كله 



انا بس حابب أوضح الزيادة دي عشان ايه 

ع حسب تفسيري الشخصي

لما رحنا نسأل بتاعت ايه في شؤون الطلبة 

قالولنا انها تبع النشاط الرياضي وجوائزه 

طيب مش احنا دافعين الحاجات دي في المصروفات أول السنة 

ولا همه قعدوا يصرفوا ويصرفوا ويصرفوا .. ومرة واحده ملاقوش فلوس في الخزنة 

فقاموا وقالوا ... يلا نلم من حبايبنا الطلبة ما كله ليهم .. هوه احنا بنعمل حاجه لينا !!


حاش وكلا يا باشا ... 

ممكن نسأل .. بقى ايه اللي قدمتوه من أول السنة لحبايبكوا الطلبة عشان الفلوس تخلص عليهم ؟؟



ممكن نسأل ولا لأ ؟؟

ايه اللي عمله اتحاد الطلبة ؟؟

ايه اللي قدمه للطلبة ؟؟

فين الفلوس اللي ادفعت للاتحاد ؟؟

انا عن نفسي مشفتش نشاطات ولا أي حاجه اتقدمت لينا

اللي شاف يقولنا ... يمكن أكون غلطان ولا حاجه 


وبعد كل ده .. هايلموا فلوس من الطلبة عشان يجيبوا الجوايز 


طبعا لو حسبنا حسبة بسيطة 

هتلاقيه هايلم 1200 جنيه تقريبا 

هيه بالنسبة لينا مش هاتفرق النصف جنيه 

بس شوف المبلغ بقى كم ؟؟

طبعا متقوليش هاجيب هدايا بالـ (( 1200 جنيه ))

أخرهم 500 جنيه هدايا 

والباقي طبعا عارفين هايروح فين 

وللأسف الشديد 

الـ (( 500 جنيه )) اللي هايجي بيهم هدايا 

هاتروح لطلاب الاتحاد .. لأنه هوه اللي كسب في كل النشاطات 


بسم الله ما شاء الله عليهم 

خمسة وخميسه .. انتوا هاتنقوا عليهم ولا ايه ؟؟

عينك عينك منك ليه ..

بسم الله ما شاء الله 

___________________

عذرا يا من تكمن وراء زيادة المصاريف 

أيا كنت وأيا كانت الاسباب 

الاسباب اللي كتبتها من وجهة نظري .. ملهاش تفسير غير كده 

ولكن 

لن أقول حسبي الله ونعم الوكيل


بل سأفضحكم في كل مكان 

سأفضح تلك الألاعيب الدنية 


لن أسامح في النصف جنيه 

اللي دفعته رغما عني


قالتها : اللي مش هايدفع هايتـ......... في الامتحانات وانتوا أحرار

مراااارتي اتفقعت

في البوست السابق 

قلت البوست القادم بعنوان مرارتي اتفقعت

انا فعلا مرارتي اتفقعت

بجد حاجه تخنق اوي 

اتخنقت من البلد دي

حصل معايا 3 مواقف الاسبوع اللي فات 

كلهم الواحد يحط قدامهم علامة تعجب كبيرة جدا جدا جدا 

نبدأ بقى ولا ايه ؟؟

نبدأ ... عشان مبقاش عندي مرارة خلاص

الاسبوع اللي فات كان فيه يوم اسمه 6-أبريل

يوم الغضب ... والمظاهرات والذي منه 

كان نفسي أضرب أو أعمل حاجه 

ولكن للأسف كان عندي امتحان

ونازل من البيت الساعة 11 عشان الامتحان

ولقيت واحد صاحبي بيتصل عليا 

هوه في اعدادي واعدادي بتتاخد في علوم

فبيقولي ده شؤون الطلبة عايزنهم وهوه رايح يشوف فيه ايه 

قلتله انا عندي امتحان .. شوف ايه الحوار عندك وطمني

اتصل عليا بعدها بساعة وقالي ده مش عارف مين قرر رفع المصاريف

فهمه كانوا عايزينهم يدفعوا المصاريف الزيادة 

كون المصاريف تزيد .. ده أكبر دليل على مجانية التعليم في مصر

سيبوكوا .. ده حقهم بردو ولازم ياخدوووووووووووووووه

قلتلوا طيب المصاريف زادت كم جنيه ؟؟

قالي : زادت .. ده عايز نصف جنيه .. الزيادة في المصاريف 

قلتلوا : نععععععععععععععععععععععععععععععععععععععععععععم

نصف جنيه .. بيهرجوا دول ولا ايه ؟؟

ده احنا الدفعة كلها 400 واحد يبقى بسلامته لم 200 جنيه

هايعمل بيهم ايه بقى ؟؟ نفسي أفهم والله 

ويجيب دفعة كاملة من كلية علوم عشان خاطر نصف جنية 

طبعا .. لا كلام يقال غير سلملي ع المترو

مش عايز أقولكم بقى 

بعدها بيومين لقيت الورقة دي في الكلية 

إعلان هام لكل الطلبة

يرجى الذهاب لشؤون الطلبة

لدفعة الزيادة في

المصروفات الدراسية

0.50 قرشا

بجد تهريييييييييييج .. نفسي أفهم عملوا ايه وليه وعشان ايه ؟؟

ده كان الموقف الأول 

_____________

بعد ما خلصت امتحاني ومروح

بعدي ع الجامعة في الطريق

لقيت الجامعة ثكنة عسكرية 

ليه ؟؟ أكيد عشان مظاهرات 6 أبريل 

دفعني الفضول .. هادخل الجامعة واشوف

لقيت المسيرة ودنيا تانية خالص

بره الجامعة غير جوه 

بس وانا واقف سمعت واحد بيتكلم عن حاجه لاحظتها بره

ايه هيه بقى ؟؟

لاحظت ان فيه ناس واقفه خارج الجامعة

مناظرهم لا تدل على طلبة جامعية ولا حتى دبلوم صنايع 

مناظرهم خريجي سجون 

وعددهم عد واغلط 

لقيت الولد بيقول لواحد صاحبوا 

انه حصل احتكاك مع واحد فيهم 

فقالهم انه كان في السجن وانهارده طلعوهم 

وقالولهم هاتضربوا العيال دي وهانخرجكم من السجن

وتاخدوا فلوووووووووووووووووووووووووووس

لغاية هنا والواحد هنج ؟؟ .. ايه ده ؟؟ ليه ؟؟ عشان ايه ؟؟

طبعا لا تعليق .. هاقول ايه غير سلملي ع المترو

الموقف الثالث بقى كان أسوأ موقف

رجعت البيت بليل وبتفرج ع برنامج القاهرة اليوم 

فطلعت صحفية اسمها اقبال بركه بتعلق ع صحف الغد

وفي وسط الحديث .. المذيع قالها .. الناس طالبتك بأنك تلبسي الحجاب 

أول ما سمعت كده .. راحت رقعت ضحكة .. ولا ضحكة راقصه في ملهى ليلي

فقالها المذيع : بتضحكي ؟؟

قالتها : - ضحكت تاني - اه ما هوه انا ضحكي بيعظهم 

قالها : ازاي بس ؟؟

قالتلوا : أصل انا مش عارف .. همه عايزني ألبس البتاع ده 

وهوه أصلا ملهوش لزمة .. ازاي بس ألبسه واشغل دماغي 

احنا داخلين على ازمة اقتصادية وعطل عن العمل 

يقولولي ألبس البتاع ده ؟؟

- انا سمعت كده .. وهنجت خااااااااااااااااالص -

ايه اللي هيه بتقوله ده ؟؟ ايه العبط ده ؟؟

المذيع : بس هوه الشارع أفتى بأنه فريضة 

ردت عليه العالمة : لأ لأ لأ .. هم يعلمون جيدا جدا انه ليس فريضة 

وبعدين ايه البتاع ده امسكه ألفه ع رأسي ملهوش أي لزمة 

مش شايفه ليه لزمة 

لأ لأ لأ 

هكذا أنهت حديثها ...

نفسي أفهم بقى ايه الكلام اللي قالته ؟؟

بتخرف بتقول ايه دي ؟؟

بردو مش هاعلق واقول رأيي

لا تعليق .. وسلملي ع المترو

سؤالين بقى ليكم :

معايا حق في إن مرارتي تتفقع ولا لأ ؟؟

وانتوا تعليقكم ايه ع الكلام ده ؟؟