الأربعاء، 15 أبريل 2009

4-15 عام منذ المحاكمات العسكرية


4-15
يا ترى ده يفكرنا بايه ؟؟
انا عارف اني لسه حاطط بوست امبارح
بس مينفعش أعدي اليوم ده من غير ما اسجله عندي
من غير ما اكتب عنه
4-15


قلنا عليه يوم لن ينساه التاريخ

يوم أن نطق هذا النظام الفاسد

الحكم بالسجن بين الـ 3 سنوات والـ 7 سنوات

ع اخواننا في المحاكمات العسكرية

ها قد مر عام 

وسيمر الباقي 

ولكن السؤال الأول يقول 

انته كنت فاكر ؟؟

هل كنت تتذكر اخوانك يوميا ؟؟

هل نسيتهم يوما من دعائك ؟؟

انا عن نفسي نسيت


وصدمت عندما فتحت موقع اخوان اون لاين ولقيت الصفحة سوداء

وبعدين اكتشفت انه قد مر عام

رجعت بالذاكرة للوراء ... ياااااه السنة عدت بسرعة كده

السنة اللي فاتت زي انهارده 

كنا غضبانين غضب

كنا زعلانين جدا

يا ترى هوه احنا بنتفاعل مع اللحظة بس ؟؟

ولا ايه ؟؟

السؤال الثاني بقى 

حتى متى هذا الظلم والاستبداد

لغاية امتى الأشراف في السجون 

والظلمة والحرامية يعتلون أعلى المناصب



لغاية امتى بس ؟؟


السؤال الأخير 

هوه هناك أمل في التغيير في مصر ؟؟

هل فيه أمل ولا ايه ؟؟

لو فيه أي بشرى يا ريت حد يبشرني





معلهش طولت عليكم ،،

الثلاثاء، 14 أبريل 2009

الحقيقة المرة وراء زيادة المصاريف الدراسية !!!


قد يكون البعض تسائل لماذا زادت المصاريف

وقد يقول الآخر .. طب ما انا بكع فلوس من أول السنة جات ع المصاريف 

والبعض الآخر يستهون بالنصف جنيه .. ودفعه وخلاص .. مش هاتفرق معايا حاجه



طيب .. محدش سأل نفسه ليه المصاريف تزيد ؟؟

معلهش يعني .. هوه فين مجانية التعليم ؟؟

ما الحكومة مش هاتصرف علينا .. طيب ماشي يا جميل 

ليه بقى بيقولوا ان التعليم مجاني ؟؟ ما يقولوا ان التعليم بفلوس 



فين بقى اللي احنا بنستهلكه عشان ندفع فلوسه ؟؟

احنا لا بناخد كتب مجانية

ولا حتى بناخد ادوات من الكلية

ولا المواد

ولا حتى المرضى الكلية بتتكلف بمصاريفهم  

ولا حتى عارفين نمارس أي نشاط في الكلية 

فين بقى اللي استهلكناه من الكلية ؟؟ عشان ندفع مصاريفه ؟؟





وبكل آسف زادت المصاريف .. وبكل أسف بردو .. الناس راحت تدفع 

وانا أولهم .. ومحدش يقولي طيب جاي تتكلم ليه ؟؟

هاقوله اني لو أضمن ان مفيش راجل في الكلية هايدفع الزيادة دي 

لكنت أول المحرضين ع الامتناع عن الدفع 

ولكن للآسف السلبية بداخلنا مش راضيه تفارقنا 


وهتلاقي واحد ورا التاني يقول طيب وهوه النصف هايفرق ايه 

يلا يا عم .. شوف مصلحتك والكلام الفاضي ده كله 




انا بس حابب أوضح الزيادة دي عشان ايه 

ع حسب تفسيري الشخصي

لما رحنا نسأل بتاعت ايه في شؤون الطلبة 

قالولنا انها تبع النشاط الرياضي وجوائزه 

طيب مش احنا دافعين الحاجات دي في المصروفات أول السنة 

ولا همه قعدوا يصرفوا ويصرفوا ويصرفوا .. ومرة واحده ملاقوش فلوس في الخزنة 

فقاموا وقالوا ... يلا نلم من حبايبنا الطلبة ما كله ليهم .. هوه احنا بنعمل حاجه لينا !!



حاش وكلا يا باشا ... 

ممكن نسأل .. بقى ايه اللي قدمتوه من أول السنة لحبايبكوا الطلبة عشان الفلوس تخلص عليهم ؟؟




ممكن نسأل ولا لأ ؟؟

ايه اللي عمله اتحاد الطلبة ؟؟

ايه اللي قدمه للطلبة ؟؟

فين الفلوس اللي ادفعت للاتحاد ؟؟

انا عن نفسي مشفتش نشاطات ولا أي حاجه اتقدمت لينا

اللي شاف يقولنا ... يمكن أكون غلطان ولا حاجه 



وبعد كل ده .. هايلموا فلوس من الطلبة عشان يجيبوا الجوايز 


طبعا لو حسبنا حسبة بسيطة 

هتلاقيه هايلم 1200 جنيه تقريبا 

هيه بالنسبة لينا مش هاتفرق النصف جنيه 

بس شوف المبلغ بقى كم ؟؟


طبعا متقوليش هاجيب هدايا بالـ (( 1200 جنيه ))

أخرهم 500 جنيه هدايا 

والباقي طبعا عارفين هايروح فين 

وللأسف الشديد 

الـ (( 500 جنيه )) اللي هايجي بيهم هدايا 

هاتروح لطلاب الاتحاد .. لأنه هوه اللي كسب في كل النشاطات 



بسم الله ما شاء الله عليهم 

خمسة وخميسه .. انتوا هاتنقوا عليهم ولا ايه ؟؟

عينك عينك منك ليه ..

بسم الله ما شاء الله 


___________________

عذرا يا من تكمن وراء زيادة المصاريف 

أيا كنت وأيا كانت الاسباب 

الاسباب اللي كتبتها من وجهة نظري .. ملهاش تفسير غير كده 

ولكن 

لن أقول حسبي الله ونعم الوكيل


بل سأفضحكم في كل مكان 

سأفضح تلك الألاعيب الدنية 


لن أسامح في النصف جنيه 

اللي دفعته رغما عني


قالتها : اللي مش هايدفع هايتـ......... في الامتحانات وانتوا أحرار


الجمعة، 10 أبريل 2009

مراااارتي اتفقعت



في البوست السابق 
قلت البوست القادم بعنوان مرارتي اتفقعت
انا فعلا مرارتي اتفقعت
بجد حاجه تخنق اوي 
اتخنقت من البلد دي
حصل معايا 3 مواقف الاسبوع اللي فات 
كلهم الواحد يحط قدامهم علامة تعجب كبيرة جدا جدا جدا 
نبدأ بقى ولا ايه ؟؟
نبدأ ... عشان مبقاش عندي مرارة خلاص
الاسبوع اللي فات كان فيه يوم اسمه 6-أبريل
يوم الغضب ... والمظاهرات والذي منه 
كان نفسي أضرب أو أعمل حاجه 
ولكن للأسف كان عندي امتحان
ونازل من البيت الساعة 11 عشان الامتحان
ولقيت واحد صاحبي بيتصل عليا 
هوه في اعدادي واعدادي بتتاخد في علوم
فبيقولي ده شؤون الطلبة عايزنهم وهوه رايح يشوف فيه ايه 
قلتله انا عندي امتحان .. شوف ايه الحوار عندك وطمني
اتصل عليا بعدها بساعة وقالي ده مش عارف مين قرر رفع المصاريف
فهمه كانوا عايزينهم يدفعوا المصاريف الزيادة 
كون المصاريف تزيد .. ده أكبر دليل على مجانية التعليم في مصر
سيبوكوا .. ده حقهم بردو ولازم ياخدوووووووووووووووه
قلتلوا طيب المصاريف زادت كم جنيه ؟؟
قالي : زادت .. ده عايز نصف جنيه .. الزيادة في المصاريف 
قلتلوا : نععععععععععععععععععععععععععععععععععععععععععععم
نصف جنيه .. بيهرجوا دول ولا ايه ؟؟
ده احنا الدفعة كلها 400 واحد يبقى بسلامته لم 200 جنيه
هايعمل بيهم ايه بقى ؟؟ نفسي أفهم والله 
ويجيب دفعة كاملة من كلية علوم عشان خاطر نصف جنية 
طبعا .. لا كلام يقال غير سلملي ع المترو
مش عايز أقولكم بقى 
بعدها بيومين لقيت الورقة دي في الكلية 
إعلان هام لكل الطلبة
يرجى الذهاب لشؤون الطلبة
لدفعة الزيادة في
المصروفات الدراسية
0.50 قرشا
بجد تهريييييييييييج .. نفسي أفهم عملوا ايه وليه وعشان ايه ؟؟
ده كان الموقف الأول 
_____________
بعد ما خلصت امتحاني ومروح
بعدي ع الجامعة في الطريق
لقيت الجامعة ثكنة عسكرية 
ليه ؟؟ أكيد عشان مظاهرات 6 أبريل 
دفعني الفضول .. هادخل الجامعة واشوف
لقيت المسيرة ودنيا تانية خالص
بره الجامعة غير جوه 
بس وانا واقف سمعت واحد بيتكلم عن حاجه لاحظتها بره
ايه هيه بقى ؟؟
لاحظت ان فيه ناس واقفه خارج الجامعة
مناظرهم لا تدل على طلبة جامعية ولا حتى دبلوم صنايع 
مناظرهم خريجي سجون 
وعددهم عد واغلط 
لقيت الولد بيقول لواحد صاحبوا 
انه حصل احتكاك مع واحد فيهم 
فقالهم انه كان في السجن وانهارده طلعوهم 
وقالولهم هاتضربوا العيال دي وهانخرجكم من السجن
وتاخدوا فلوووووووووووووووووووووووووووس
لغاية هنا والواحد هنج ؟؟ .. ايه ده ؟؟ ليه ؟؟ عشان ايه ؟؟
طبعا لا تعليق .. هاقول ايه غير سلملي ع المترو
الموقف الثالث بقى كان أسوأ موقف
رجعت البيت بليل وبتفرج ع برنامج القاهرة اليوم 
فطلعت صحفية اسمها اقبال بركه بتعلق ع صحف الغد
وفي وسط الحديث .. المذيع قالها .. الناس طالبتك بأنك تلبسي الحجاب 
أول ما سمعت كده .. راحت رقعت ضحكة .. ولا ضحكة راقصه في ملهى ليلي
فقالها المذيع : بتضحكي ؟؟
قالتها : - ضحكت تاني - اه ما هوه انا ضحكي بيعظهم 
قالها : ازاي بس ؟؟
قالتلوا : أصل انا مش عارف .. همه عايزني ألبس البتاع ده 
وهوه أصلا ملهوش لزمة .. ازاي بس ألبسه واشغل دماغي 
احنا داخلين على ازمة اقتصادية وعطل عن العمل 
يقولولي ألبس البتاع ده ؟؟
- انا سمعت كده .. وهنجت خااااااااااااااااالص -
ايه اللي هيه بتقوله ده ؟؟ ايه العبط ده ؟؟
المذيع : بس هوه الشارع أفتى بأنه فريضة 
ردت عليه العالمة : لأ لأ لأ .. هم يعلمون جيدا جدا انه ليس فريضة 
وبعدين ايه البتاع ده امسكه ألفه ع رأسي ملهوش أي لزمة 
مش شايفه ليه لزمة 
لأ لأ لأ 
هكذا أنهت حديثها ...
نفسي أفهم بقى ايه الكلام اللي قالته ؟؟
بتخرف بتقول ايه دي ؟؟
بردو مش هاعلق واقول رأيي
لا تعليق .. وسلملي ع المترو
سؤالين بقى ليكم :
معايا حق في إن مرارتي تتفقع ولا لأ ؟؟
وانتوا تعليقكم ايه ع الكلام ده ؟؟

الثلاثاء، 7 أبريل 2009

همسات في ثوب جديد

همسات شاب

مدونتي الحبيبة

في حلة جديدة

بقالي فترة عايز أعمل تغييرات

بس مش عارف أعمل ايه !!!

انهارده بس .. قررت البدأ 

وها أنا الحمد لله جددتها بالكامل

وافتكرت أول يوم فتحت فيه المدونة

حيث كانت البداية مع


وقعدت فترة .. وبعدين قررت تغير الاسم من خواطر إلى همسات

وعملت التصميم ده


بعدها .. غيرت التصميم لأول مرة


ودي بقى المرة التانية اللي غيرت فيها المدونة

يا رب تكون عجبكم الاستايل الجديد


أقوم بقى من الحلم ده 

نرجع لأرض الواقع 

غيرنا خلاص 

وعايز أكتب بوست جديد

البوست القادم بعنوان 

مرارتي اتفقعت 

انتظروني

السبت، 4 أبريل 2009

بين الانكسار والمقاومة .. أين تكون ؟؟


السكة الحديد وكم لها من ذكريات معي

وبطبيعة ان القطورة مش بتيجي في معادها 

وآخرها انهارده .. القطر متأخر كالعادة

فواقف .. ولمحت بعيني قضيبي السكة الحديد

بيلمعوا أوي  .. كل مرة أشوفهم بيبقى نفسي ألمسهم

مش عارف ليه .. بس هوه احساس وخلاص 

عموما خلونا في السكة الحديد .. وطبعا تغيراتها الجديدة

والخط العريض المكتوب في كل المحطات

وعدت الهيئة فأوفت

وكاتبين قطار سريع كل ساعة

ومميز كل نصف ساعة

وطبعا الحقيقة ليست كذلك

فيا ريتها لا وعدت ولا أوفت

المهم .. كم أقضي من أوقات على رصيف السكة الحديد

يا اما بسمع أناشيد او قرآن .. وأحيانا بقرأ في كتاب

أو بفضل باصص للقضبان اللي بتلمع

اللي بحس دايما انها وراها أسرار كبيرة جدا

مش عارف ليه 

انهارده بقى وعلى عادتي 

وقفت أنظر للقضبان اللامعة

وخطر ببالي بعض الأفكار

كم من مرة حملت تلك القضبان قطارات

وما تحمله القطارات من كل أنواع البشر

الغني والفقير .. الطالب والعالم .. والجاهل

حملت كل أنواع البشر في تلك المقطورات

فهل في يوم أذعنت تلك القضبان عن حمل القطار

هل في يوم توقفت عن العمل .. وطلبت أجازة

طبعا .. أيام كتير تعطلت وعطلت مسير القطارات

بس ليه ؟؟ .. عشان مفيش اهتمام .. مفيش متابعة

ولكن ان اهتممنا بها .. عملت بكل كفاءة ..

كذلك القطارات والكراسي والأرفف

تعاملوا مع جميع البشر .. كم كسروا فيها وعاملوها بعنف ؟؟

فما كانت ردة فعلهم .. اتكسروا .. وتوقفوا عن العمل

طبعا .. ما همه جماد .. ايه اللي هايحصل فيهم يعني ؟؟

هايزعلوا ولا هايتأمصوا ؟؟!!

طبعا لأ ... ولكنهم توقفوا عن أداء مهمتهم

طيب ما تيجوا بقى نحط نفسنا مكانهم

وباعتبار انهم جماد واننا بني آدمين

فلكل منا ردة فعل تناسب طبيعته

يعني مثلا احنا اهوه دولقت بنتعامل مع ناس كتير

منهم الكويس ومنهم الوحش .. وبنتأثر بناس ونزعل من ناس

طيب ردة فعلنا ايه ؟؟

خليكوا فاكرين ردة فعل الجماد ايه ؟؟

احنا هانتئمص ونزعل وناخد جنب من اللي زعلنا

اممممممممممممممممممممم

طيب .. ايه الجديد بقى ؟؟

فرقت ايه عن الجماد .. اللي اتكسر لمجرد معاملة الناس السيئة

طيب ما انته اتكسرت انته كمان .. بس بشكل مختلف

يعني مش واجهت المشكلة .. ولا عرفت تتصرف معاها

انته تصرف تصرف الجماد بالظبط !!

هاتقول لأ .. وانا مالي ومال الجماد ؟؟

هاقولك يا حبيبي انته والجماد واحد

الجماد مقدرش يتعامل بمرونة مع الإساءة

مقدرش يتحملها .. بدأ يتكسر .. بدأ يتهالك

طيب انته بقى عملت ايه ؟؟

ما هوه انته متعاملتش بمرونة برده

انكسرت داخل  نفسك ..

يبقى مفرقتش حاجه عن الجماد

لا .. انته لازم تحتوي الناس كلها

أكيد هنقابل الوحش والحلو 

بس شطارتك انته بقى اللي تخليك تقدر تحتويهم 

مش تزعل منهم 

شطارتك تخليك قدوة ليهم

مش تاخد جنب وتركن

شطارتك هاتجيبلك جبال من الحسنات وانت لا تدري

بدلا من جبال السيئات من جراء قطيعة الناس

طيب انا محتاج ده ليه ؟؟

هاقولك بقى .. لأن كل واحد فينا بيأدي دور 

الجماد كان قضبان أو كرسي أو رف بيأدي الدور اللي عليه

احنا كمان كده .. كل واحد ليه دور بيأديه 

بس يا ترى ..

هل بنأديه صح ؟؟

هل بتأديه صح ؟؟

هل بتأديه صح ؟؟

ولا بتنكسر من أول جفاء في التعامل 

من أول شوكة في الطريق تواجهك ؟؟

من أول عقبة .. بترجع ؟؟

بس كده