السبت، 13 ديسمبر، 2008

PRISON BREAK


Prison Break

مسلسل أمريكي

حد سمع عنه ؟؟

احم احم .. قصدي حد مسمعش عنه !!

ده مسلسل مشهور جدا .. وعلى فكرة انا مش من هواة الأجنبي خالص

بس هوه واحد صاحبي اعطاني المسلسل وقالي شوفه وهايعجبك وهاتندم لو مش شفته

فقلت .. خلينا نشوفه .. مش هانخسر حاجه ... بس تعرفوا اني مش ندمت اني اتفرجت عليه

اه .. والله .. لأني وصلت أو استنتجت حاجه كبيرة جدا .. ألا وهي حديثي لكم اليوم

انا كنت بتفرج على المسلسل ولفت انتباهي أول حاجه ان حجم الحلقة فيما يقارب 142 ميجابايت

والحلقة بالظبط 40 دقيقة وطبعا مش هاتكلم عن الصوت والصورة ونقاوتهما التي تضاهي الحقيقية

ودي كانت أول حاجه وقارنتها بأفلامنا العربية .. اللي حجمها كبير جدا ولا تقارن بتلك الأجنبية

بس طبعا ده مش اللي أنا عايزه .. ده العادي بتاعنا .. انهم سابقين في كل حاجه للأسف

ما علينا بكل ده

وانا بتفرج على المسلسل بردو .. اندمجت داخل البيئة بتاعتهم شويه

وبدأت أشوف الناس دي بتتعامل ازاي مع بعض .. ما هو قوام هذا المجتمع الذي يقود العالم

اه الأمريكان هم الذين يقودون العالم ... بس فأنا من خلال المسلسل .. كنت بحاول اندمج مع الشخصيات

بحاول أشوف المجتمع ده .. ايه اللي فيه المميز عننا ؟؟ .. ما هو المميز في هذه البيئة ؟؟

والتي يمكنها من أن تقود العالم

فوجدت الآتي :

1- عدم احترامهم لبعضهم البعض .. لدرجة انهم بيقفلوا التلفونات في وجه بعضهم البعض .

2- التعامل بينهم لا يقوم إلا على اساس المصلحة الشخصية .

3- عدم الأمان لأي فرد حتى ولو كان صديقك .

4- استغلال المناصب وعدم الاكتراث لأي شخص .

وغيره الكثير من تلك العادات الأكثر من سيئة

ولكن انا قعدت أفكر .. هل يا ترى الحاجات دي اللي تخلي الواحد يقود العالم ؟؟

هل يا ترى ذلك صحيح ؟؟

لأ .. طبعا ... والا مكنش حد غلب وكنا مسكنا العالم من زمااااااااان

ولكن وجدت أيضا أشياء أخرى لاحظتها أثناء مشاهدتي للمسلسل

ومنها :

1- العزيمة والإصرار.

2- الاخذ بالأسباب.

3- الإيمان - وان لم يكونوا مسلمين أساسا -.

وغيرها بردو

بس لما لاحظت الكلام ده موجود .. فهمت عالطول همه ليه ماسكين العالم

فهمت لماذا قادوا هذه الدنيا

شوفوا .. هم بلا أهداف نبيلة

ولكن بالتلات حاجات دي هاتقود الدنيا

بالعزيمة والاصرار والاخذ بالسباب والايمان

هذه هي المسببات للنجاح والريادة

بجد زعلت كتير .. لأننا نفقد هذه الأشياء

لأ .. بالعكس .. احنا ديننا بيحث على ذلك

واحنا مش بنعمل بهذا الدين

لأ .. وكمان احنا لينا أهداف نبيلة عكسهم تماما

بس بردو .. لأننا مفيش عزيمة عندنا ومستنين النصر من عند ربنا

وقاعدين في بيوتنا مستنين هذا النصر .. اللي مش هايجي إلا لما نتحرك

وإلا كان ربنا أعطاه لبني اسرائيل .. اللي توقفوا ولم يجاهدوا في سبيله

وقالوا : (( اذهب انت وربك فقاتلا انا ها هنا قاعدون ))

فربنا خذلهم وقال لهم : (( فتيهوا في الأرض ))

مش عايزين نكون زي بني اسرائيل

مش عايزين ربنا يغضب علينا

احنا بايدينا النصر

احنا اللي بايدينا كل حاجه

فيلا بينا نجدد نيتنا

هيا بنا نعود إلى الله

الاثنين، 8 ديسمبر، 2008

رسالة عيدنا لمن يقضونه خلف قضباننا


رسالة عيدنا لمن يقضونه خلف قضباننا


لخيرت الشاطر وأخوانه




يا أمي يطيب السجن ... والعمر ما أحلاه


لما يكون الأسر مهر بسبيل الله


يا أمي وحنين الأهل .. في القلب ما أغلاه


لكن سبيل الوطن عزم وسجن وحراب


روحك ما يهمها اعتقال .. مهما طال السجن وطال


هذا دربك درب رجال ... يا أبي درب رجال


سجنك خلوه وابتهال .. والزنزانة جمع أبطال


منك سجانك ما ينال ... لا لا ما ينال


رأسك عالي .. جبينك عالي


عالي عالي عالي عالي


عزمك صامد مثل جبال


وانته الغالي لأهلك غالي


غالي غالي غالي غالي


قسما تحريرك بالبال


لو سجنوا جسمك يا خيرت


أو غطوا منك العيون


تبقى الحر ويبقى الغاصب


بديارك هو المسجون


عهدا منا نوفي الدين


ما ننساكم أسرانا


احنا وياكم صامدين


يوم الفرحة ملقانا


كل عام وانتم إلى الله أقرب


ولنبيه أقرب ولطاعته أدوم


كل سنة وانتم طيبين

الأحد، 7 ديسمبر، 2008

بيقولوا العيد بكره !!!!

كنت صايم انهارده ؟؟

طيب كويس أوي





فطرت ؟؟

طيب بالهنا والشفا






دعيت قبل الفطار طيب ؟؟





طبعا دلوقت بتقول

ايه الغلاسة دي ؟؟





لأ .. والله مش غلاسة ولا حاجه

بس دول بيقولوا العيد بكره





تخيل !!

العيد بكره

يعني هانصلي وهاندبح






طيب يا سيدي .. حبيت أقولك

كل عام وانت إلى الله أقرب ولطاعته أدوم

وإن العيد ليس لمن لبس الجديد

وانما العيد لمن طاعته تزيد

كل سنة وانته طيب


الخميس، 4 ديسمبر، 2008

مش هاقضي العيد لوحدي


باقي على العيد كم يوووووووم ؟؟


مش عـــــــــــــــارف


ومش عايز أعــــــــرف


ليـــــــــــــــــــه ؟؟


يــــــــــــــا ترى ؟؟


عايز أقضي العيد مع بابا



مش عايز أقضيه لوحدي


يا ترى ده وضعك ؟؟


حاسس بكده !!


ولا ايه ؟؟


طيب تعرف مين دي ؟؟




طيب وده









ها .... يا ترى انته تعرفهم ؟؟

طيب فاكرهم ؟؟

فاكر قضيتهم ؟؟

فاكر ولا ايه ؟؟


طيب



دول بقى










و



أكييييييييييد .. انته تعرفهم


بس يا ترى هل فاكرهم دايما


هل دايما بتدعيلهم ؟؟


المشكلة اننا في زحمة الحياة ... نسيناهم


يا ريــــــــــت وأتمنـــــــى انكم مش تكونوا نسيتوهم


أتمنى أنكم تكونوا بتدعوا لهم أولا بأول


يا جمــــــــــــــــاعة العيد داخل اهوه



والناس دي في السجن


أولادهم اللي صورهم في الأول


هايقضوا العيد لوحدهم


مفيش بابا


مفيش الحضن الحنين اللي بعد الصلاة


يقولك كل سنة وانت طيب يا حبيبي


مفيش بابا اللي كان بياخدك عشان تدبحوا الاضحية


مفيش بابا اللي بياخدك معاه عشان تزور قرايبك


مفيش .... مفيش .... مفيش .... مفيش



يا ريت مش ننساهم من دعائنا

الثلاثاء، 2 ديسمبر، 2008

غزة بين المطرقة والسندان






غزة



غزة أرض محتلة



جزء من فلسطين الحبيبة



تحت الحصار



تحت رحمة أخوان القردة والخنازير



تحت رحمة من لا يرحم أخيه



تحت ظلم وعدوان



غزة



بين المطرقة والسندان



سبحان الله أن نكون مسلمين ونرفض مساعدة أخواننا في فلسطين



سبحان الله أن يكون بيدنا نجاة إخواننا في غزة ونرفض



سبحان الله أن يرزقنا الله موقع متميز وبدلا من أن نخدم به الإسلام



نخدم به غير المسلمين من إخوان القردة والخنازير



فعلا ... يا سبحان الله



ازاي بس ؟؟



ازاي يكون معبر رفح عندنا .. ويتحكم فيه غيرنا !!



ازاي تلاقي أخوك هايموت وانته ترفض أن تمد له يد العون



يا ترى .. هل عشان انته هاتموت لو ساعدته



لا أظن ذلك بتاتا



بس مش عارف



هوه احنا ليه كده



ليه سلبيين ؟؟



ليه سايبين غزة بين المطرقة والسندان !!

الجمعة، 7 نوفمبر، 2008

جزاكم الله خيرا

السلام عليكم ورحمة الله وبركاته
عاملين ايه ؟؟
أكيد وحشتكوا !!
محدش بقولي ايه الثقة دي ؟؟
بس انا أعرف لما تحب حد من قلبك .. يبقى هوه كمان بيحبك
عموما أنا بحبكم جدا جدا جدا جدا .. ووحشتوني بجد
بس انا جاي أقولكم حاجه ع السريع كده
ايه هيه بقى ؟؟
هيه العنوان
لا تخشوا في الله لومة لائم
حياتي فرقت معايا كتير في الأيام اللي فاتت
حياتي اتغيرت 180 درجة
حياتي اتقلبت وده كله بسبب أول تحقيق
بجد والله
انا أخذت أول تحقيق
وسببه اني بدعو إلى المساواة والإخاء بين المؤمنين
تخيلوا ؟؟
دي تهمتي
عرفتوا ليه حياتي اتغيرت
عشان بقينا بنحارب ربنا
وبقى اللي بيدعوا لله .. هو المتهم
يعني لو كنت بحشش في الجامعة
مكنش حد هايكلمني
بالعكس .. كانوا هايكرموني
ما هيه معناها كده
اللذيذ جدا في الأمر
انهم اتهموني بشوية حاجات ... انا مش عملتها
ولا كان في دماغي أعملها أصلا
أنا راجل ماشي جوه الحيط
وفجأة .. ألاقي نفسي وسط النار
لييييييييييييييه ؟؟
من غير سبب
اهوه
تلقيح جتت
بس بجد يا جماعة
انا لا عملت حاجه ولا علقت ولا وزعت وجالي تحقيق
وانا من شاعة ما دخلت الكلية وانا بتجنب الحاجات دي
ولكن هيه اللي جائت لغاية عندنا
فبالله عليكم .. .محدش يتهزم .. محدش يتراجع
عشان خاطر تحقيق حقير لا راح ولا جاء
نحن على خطى الحبيب أيا كان
قبل التحقيق وبعده
يمكن بعد التحقيق .. أصبح الثبات أكتر
قبل التحقيق كنا بنخاف
عموما
أحب اوجه شكر جزيل جدا لأمن الدولة
ربنا يكرمكم يا رب
ويجعل هذا التحقيق في ميزان حسناتكم وسيئاتكم
اه .. في ميزان حسناتكم .. عشان كسرتوا حاجز طويل جدا كنت حاطه قدامي
وفي ميزان سيئاتكم عشان يتحاربوا ربنا
بجد بجد بجد انا مبسوط منكم جدا
فجزاكم الله كل خير ،،

السبت، 27 سبتمبر، 2008

ومن الحب ما قتل !!!





ها ... مش عارف والله أقول ايه ؟؟


رمضان خلص خلاص .. مش عارف هل نفرح لدخول العيد ولا نزعل عشان اخواننا في فلسطين ..

بجد الواحد متلغبط أوي ..


ربنا ييسر الحال لاخواننا في فلسطين .. يا رب لا يأتي على المسلمين عيد آخر إلا والاسلام عزيز

يا رب آمين آمين آمين


كل سنة وانتوا طيبين بمناسبة عيد الفطر المبارك أعاده الله علينا أعواما عديدة وازمنة مديدة






ندخل في موضوعنا بقى


زي ما انتوا شايفين العنوان .. الموضوع عن الحب


اممممم .. حاجه جميلة مش كده


اه .. طبعا حاجه جميلة ومفيدة جدا


عارفين ليه ؟؟!!


طيب لو هيه ضارة ومش بتفيد ... مكنش ربنا خلقها


الحب ده نعمة كبيرة جدا من عند ربنا ... حاجه كده لا توصف


يعني كل اللي نقدر نقوله الحمد لك يا رب على هذه النعمة


ودي نعمة من نعم لا تحصى ... نعمة الحب


الحب ده مشاعر وأحاسيس جميلة جدا ..

وكل اللي اقدر اقوله ان الانسان ميقدرش يعيش من غير الحب


عارفين ازاي ؟؟


يعني احنا بنحب أهلنا ... فبنعمل كل حاجه عشان نرضيهم .. وميكونوش زعلانين


وناس تانية بتحب الفلوس .. فتبذل الغالي والنفيس من أجل الفلوس


وناس بردو بتحب شغلها جدا .. تلاقيها حياتها كلها الشغل ومفيش غير الشغل


شفتوا ازاي بقى !! .. إننا من غير الحب منقدرش نعيش


شفتوا بقى الحب حاجه جميلة ازاي !!!


اه .. والله حاجه جميلة جدا ومنقدرش نعيش من غيرها


بس ثانية ... ثانية واحدة يا فندم تعالى هنا


تعالى نعمل مقارنة كده بين الحب الموجود اليومين دول والحب الحقيقي


الحب بتاع اليومين دول .. الولد بيحب بنت وعايش حياته كلها عشانها


ايه ده ؟؟ ... هل ده صح ؟؟ .. انا مش هاقول حرام


عشان لو قلت حرام ... هايطلع ناس ويقولي عليا كلام عجيب (( متطرف ومتزمت والحاجات دي ))


بس مش كده خالص ... لما انته بتحب بنت لا تربطك بيها أي علاقة شرعية .. يبقى ده اسمه كلام


يا جماعة احنا دلوقت كل اللي بنعمله بنقلد الغرب ..


ونفسي في يوم أشوف شاب غربي بيقلد واحد فينا


وهوه السؤال هل وصلت بينا اهتماماتنا ان كل حياتي هي مجرد حب فتاة والعكس ..

يعني هل وصلت اهتماماتنا لهذه الدرجة ؟؟


ملعهش لو الاجابة بنعم .. يبقى تراجع نفسك ..

انا مش بقول انك بتعمل حاجه حرام لأني مش بطلع فتاوي


بس لما تكون كل اهتمامتنا هي حب سواء حب واحدة

أو حب زوجتي أو حب ولادي أو أهلي أو .. أو .. أو .. إلخ


لما تكون دي كل اهتمامتنا .. يبقى فيه حاجه غلط

احنا عندنا قضايا تانية كتير محتاجين نركز فيها .. دون ترك الحب


ولكن الاعتدال الاعتدال الاعتدال


يعني بمعنى أصح أنا طالب في الجامعة .. لما يبقى كل اللي بعمله

اني بروح أشوف واحده زميلتي


يمكن هيه بتبادلني نفس الشعور أو لأ


بس انا كل حياتي إني بحبها .. وبعمل كل حاجه عشان أرضيها ..

طيب سؤال .. لو انته فعلا بتحبها يبقى اتقدم لها


مينفعش تقولي .. لأ احنا في الجامعة بنتعرف ..

ولما نخلص يبقى أتقدم .. لأ يا حبيبي ... ركز كده


احنا في الجامعة عشان ندرس .. مش عشان نحب ..

هاتحب واحدة يبقى تتقدم رسمي .. مينفعش تفضل بتتعرفوا على بعض


لغاية ما كل الدفعة تعرف حكايتكم وبعدين بعد ما تتخرج تقول ..

لأ مش هيه دي اللي في دماغي


وبعدين لما انته هاتقضي سنوات الجامعة عايش بتحبها

ومش مهتم بدراستك عشان بتحبها .. ومش ومش ومش


هاتيجي هاتتخرج هاتكون ضعيف في مهنتك ...

طيب هاتحققلها اللي هيه عايزاه ازاي بقى .. وانته ضعيف مهنيا ..


وكله من وراء الحب القاتل بتاعك اللي كان مسيطر عليك وانته في الجامعة


والله يا جماعة باشوف حالات تصعب على البني آدم .. ايه ده ؟؟

البنت رخصت نفسها للدرجة دي


بس تعرفوا .. البنت هيه الخسرانة في الآخر ..

هيه اللي هاتخسر كل شئ .. اه والله هيه الخسرانه


انتوا عارفين البنت عامله زي ايه ؟؟ .. عامله زي الصورة دي بالظبط






يوم ما ترخص تفسها تبقى عامله زي الصورة اللي على اليمين

ويوم ما تحافظ على نفسها تبقى عامله زي الصورة اللي على الشمال




طيب ما تيجوا نشوف الحب الحقيقي ..

أعظم قصة حب حصلت في التاريخ بين النبي صلى الله عليه وسلم والسيدة خديجة


ايه ده ؟؟ .. هوه الاسلام فيه حب .. اه يا بابا فيه حب ..


انا مش قلتلكم ان الحب ده نعمة


ودلوقت بقولكم انه سلاح ذو حدين .. عارفين ازاي ؟؟


زي التلفزيون والانترنت بالظبط ..


الحب قد يكون بناء وقد يكون هدام .. ازاي بقى ؟؟


براحة عليا يا عم .. خدني براحة براحة ومتستعجلش


بص يا سيدي .. الحب بناء للمجتمع .. اه .. هوه فعلا بناء


لما الشخص يتزرع جواه حب المحتمع وحب الناس فهوه

هايطلع يحافظ على مجتمعه يحافظ على ناسه وأهله


يحب شغله فيخلص فيه .. يحب كليته .. فيخلص فيها جدا

ويؤدي مهنته على أكمل وجه


فلما يشوف أي حاجه غلط في مجتمعه .. هايروح يغيرها بايده ..

لأنه بيحب هذا المجتمع ومستريح فيه


شفتوا بقى هوه ازاي بناء !!

طيب وهو في نفس الوقت بيبقى هدام

لما يطغى الحب على كل شئ ويبقى حياتك كلها حب ساعتها يبقى هدام

ولنا في ذلك مثال قريب مننا جدا ... سيدنا عبد الله بن أبي بكر الصديق

كان بيحب زوجته لدرجة لا توصف

تخيلوا انه مكنش بيطلع الغزوات مع الرسول صلى الله عليه وسلم

عشان من كتر حبه ليها مش قادر يبعد عنها

حاجه جميلة جدا المشاعر دي .. بس مش تطغى على كل شئ

لغاية ما وصلوا لدرجة انه تغيب عن صلاة الجمعة ..


عشان كان بيقول شعر في زوجته

شوفتوا وصلنا لغاية فين .. ضيعنا الفريضة من أجل الحب ..


ساعتها بس سيدنا أبو بكر أمره بتطليقها

الاعتدال ثم الاعتدال ثم الاعتدال
قال رسول الله صلى الله عليه وسلم
(( يا معشر الشباب من استطاع منكم الباءة فليتزوج
ومن لم يستطع فعليه بالصوم .... ))
انا طولت عليكم أوي في البوست ده انا عارف ..


بس همه كلمتين كانوا في نفسي من زمان

وبصراحة مفيش أحلى من المدونة حبيبتي عشان أقولهم فيها

عيد سعيد علينا وعليكم

وكل عام وانتم إلى الله أقرب ولطاعته أدوم ،،

وإلى لقاء قريب ان شاء الله

الثلاثاء، 9 سبتمبر، 2008

حكومة الطوارئ

بسم الله الرحمن الرحيم

ازيكم يا جماعة ؟؟

أخباركم وأخبار رمضان ؟؟

يا رب تكونوا بخير دوما

وربنا يتقبل منكم الصيام والقيام

انهارده معانا موضوع جميل أوي

هو

حكومة الطوارئ


اه يا عم منك له ... حكومة الطوارئ

خفتوا ولا ايه ؟؟ .... لأ لأ .. مش تخافوا

يعني ايه حكومة الطوارئ ؟؟

- هل معناها انها اللي بتحكم بقانون الطوارئ .. اللي من حقه يمسك أي حد في أي وقت ؟؟

هل ده معناه ؟؟

يمكن ده المعنى اللي في دماغكم ... او اللي عند ناس كتير

لأ لأ .. مش ده المعنى الحقيقي


المعنى الحقيقي لحكومة الطوارئ

هو

الحكومة التي تتعامل مع الحادث حين حدوثه .. لا ان تتجنبه قبل وقوعه

واضح كده

طيب جميل

ده معناه ايه بقى ؟؟

طيب نفكر شويه كده

ونجيب مثال

طريق متكسر .. وكل تعرجات والسيارات عليه كتير

الحكومة المثالية تفكر في الحل وتقول انها تعيد رصف الطريق

أما

حكومة الطوارئ تظل ساكنة حتى ان تحدث حوادث وبعدين تفكر في الحل

أيهما أفضل ؟؟

أكيد الحكومة المثالية


طيب ... طيب

ما تيجوا كل واحد فينا يبص على بيته ومحل اقامته ومجتمعه

هنلاقي علامات استفهام كبيرة في كل مكان

هتدخل على الوالد تلاقي علامة استفهام كبيرة

ليه ؟؟ ... أصل الوالد العزيز تعبان أوي وراقد في السرير

ايه يا بابا فيه ايه ؟؟

تعبان يا ولادي ... يلا على المستشفى

نروح المستشفى ... نلاقي السكر والضغط والقلب والكبد

يا الله .. انته فين يا حاج من زمان ؟؟

أصله مكنش حاسس يحاجه

طيب ده مش تصرف حكومة طوارئ !!

ليه مكنش بيعمل كشف دوري كل سنة ويطمئن على الأمانة اللي ربنا أعطاها له

يبقى مفيش غير كلمة واحدة ... وهي حكومة طوارئ

طيب نطلع من عن الوالد العزيز

وندخل على الوالدة

تلاقيها قاعده بتعيط

مالك يا أمي ؟؟

اخوك ... جاب مجموع وحش السنة دي

انا من السنة الجاية هاشد عليه ... ولازم يذاكر

يا سلام ... يعني هوه احنا مش نشد الا لما يجيب مجموع وحش

طيب وانتي فين طول السنة .. كان قاعد بيلعب ... مش كلمتيه ليه ؟؟

يبقى مفيش غير كلمة واحدة وهي .. حكومة طوارئ

نطلع من عند الوالدة مهموم وحزين

تطلع على الأخت تلاقيها في المطبخ

تقولك يا فلان .. تعالى .. الله يخليك

شيل الزبالة ارميها ... انا خلاص مش قادرة أستحملها

تبص على كيس الزبالة ... تلاقيه مليان والزبالة مكبوبة منه على الأرض

يعني لازم نستنى لغاية ما الزبالة تتكب على الأرض عشان نرمي الزبالة

مينفعش لما نحس ان الكيس امتلأ نوعا ما ... نشيلها ونرميها

يبقى مفيش غير كلمة واحدة ... وهي حكومة طوارئ

نطلع بعد ما رميت الزبالة .. تدخل غرفتك ..تلاقي تلفونك بيرن

ترن .. ترن

مين ؟؟ يا فلان عندنا امتحان بكره في كذا وكذا

ايه ده ؟؟ انا مش مذاكرهم ... طيب الحق ذاكر

تسهر طول الليل تذاكر وتذاكر .. وبعدين

تدخل الامتحان بعد ما واصلت وطبقت يومين

تدخل الامتحان متحلش كويس

وده العادي ... هوه انته اصلا مذاكر أول بأول

يبقى مفيش غير كلمة واحدة ... حكومة طوارئ




لو بصينا على تصرفتنا

لو بصينا على شارعنا

لو بصينا على مجتمعنا


هتلاقوا اننا كلنا عبارة عن حكومة طوارئ

منتصرفش ونتجنب

لأ لأ .. نستنى لغاية ما يحصل اللي يحصل

ونقول يا ريت اللي جرى ما كان

طيب ... وليه ؟؟

طيب ليه بنعايب على الحكومة بقى

ما نغير نفسنا الأول

هاتقولي وانا هافرق ايه ؟؟

هاقولك تفرق كتيييييييييييييييييير


كتيييييير أوي كمان


طيب هاقولك حاجه

احنا طول عمرنا بنقول مفيش فايدة

وانته مش جربت ولا مرة انك تغير نفسك

طيب ما تيجي المرة دي نجرب

هانغير نفسنا ونشوف ايه اللي هايحصل ؟؟

جرب والله ما انته خسران حاجه


ابدأ بتغيير نفسك

عشان حال البلد يتغير ونتقدم للأفضل

ولا تنسى قول الحبيب محمد صلى الله عليه وسلم

(( لا يغير الله ما بقوم حتى يغيروا ما بأنفسهم ))

ورمضان كريم علينا وعليكم

ولنبدأ من الآن

وننوي التغيير

انا أول واحد

مين التاني ؟؟

الثلاثاء، 26 أغسطس، 2008

قــــف .... أعد حسابـــاتك




ها قد مرعام .... وسيتلوه عام وعام

مررت بأيام جميلة .... وأيام مريرة

استمتعت بأيام ... وكرهت أياما

ونسيت في كل ذلك ؟؟

هل هذا الطريق الذي تريده


أم لا

نسيت ونسيت ونسيت حتى مر عام كامل دون ان تشعر به

فأين أنت الآن ... هل أعدت التفكير .... ونظرت إلى الطريق



هل هو الطريق المناسب ... أم أنك تريد التغيير .. إذا أردت

فانتبه لأن أمامك مخرج ... أعد تفكيرك .. وان كان طريقك خاطئ

فالحق المخرج ... فإنه قد يكون المخرج الأخير في طريقك الطويل

طريقك طوييييييييييييل والزاااااااااااااد قليييييييييل

أخي الكريم : توقف الآن وأعد اختيار طريقك ..... واختر زادك

فكما ترى الطريق طويل .... والزاد لا يكفي لهذا الطريق الطويل

ولكن اغتنم أول فرصة تأتي أمامك ... فهي قادمة امامنا .. لا تدعها تفوت


أما الطريق فهو حياتنا اليومية .. التي نمر بها كل يوم

وأما المخرج .. فهو شهر رمضان .. فهو مخرج لنا من كل ما نحن فيه

وأما الزاد .. فهو الصديق اختر لك صديقا حسنا ... يعينك لا يفسدك

-_-_-_-_-_-_-_-_-

وأخيرا .... رمضان كريم

وكل عام وأنتم بخير بمناسبة حلول هذا الشهر الكريم ،،،

الخميس، 14 أغسطس، 2008

في ذكراك ما دمنا .... لن ننساك أبدا


السلام عليكم ورحمة الله وبركاته ،،،


اتأخر البوست ده أوي ... بس انا كنت متعمد ذلك عشان انهارده يوم لا يمكن اني انساه ابدا

انهارده كم ؟؟

14 -8 - 2008 م .... يا الله ... الايام بتعدي بسرعة أوي

عارفين مين ده ؟؟

مين يا ترى ... مين ... مين ...

أقولكم أنا مين !!

ده الأستاذ محمد الخولي الله يرحمه

أعظم معلم عرفته في حياتي

وانا جاي انهارده أكلمكم عنه .. مش هاكلمكم

هاقول حاجات صغننة أوي كده .... بس ان شاء الله تستفيدوا منها

انا منقطع عن التدوين منذ شهر ...

مش عارف السبب ... بس مكنتش عايز أكتب حاجه

دايما في بالي الأستاذ محمد ...

فقلت لن أكتب قبل يوم 14-8 .. هاتقوليلي ليه ؟؟

لأنه اليوم اللي توفى فيه .... يوم 14 -8 -2007 م

يااااااااه .. السنة عدت بسرعة أوي ..

انا لسه فاكره وهوه معانا .. شوفوا الراجل توفي

وعدت سنة على وفاته .... ياااااااااه بجد مش مصدق

أول حاجه عايز أقولها .. فوقوا لنفسكم ..

الموت مش بعيد عنكم وممكن في أي وقت ..

لا تتغر بصحتك ووسامتك

ده انته أقرب للموت منهم ... فيا جماعة اشحذوا الهمم ..

بجد مين كان يصدق اننا ممكن بين يوم وليلة نفقد الأستاذ محمد

محدش والله ؟؟ .... بس اهوه حصل .. يبقى احنا نتعظ بقه ،،،

الراجل ده عظيم جدا ... انا مش قادر أنساه ... وتقريبا كل يوم بفتكره ...

رغم انه مش مشهور ولا حاجه ...

بس هوه كان مسيطر على قلوب الجميع ...

والله لو كان هيقول لحد ارمي نفسك في البحر ..

كان يرمي نفسه ... تخيلوا .. بنحبه قد ايه ؟؟

انا بقالي سنة بتذكره يوميا ... مش قادر أنساه أبدا ...

في كل المواقف اللي بمر بيها بافتكره ..

بافتكر النصايح .. بافتكر الحب والود

ودي ثاني حاجه عايز أقولها ... لازم تكون عضو مؤثر في اللي حواليك ..

بأسلوبك اللطيف وحبك للجميع ...

بحفاظك على صلاتك ..

بتفوققك في دراسته ...

ده كله يخلي الناس تحبك ...

وتقدر تكون مكان الأستاذ محمد ..

الناس تذكرك حتى بعد وفاتك

مش حابب تكون كده ولا ايه ؟؟؟ ....

متحبش الناس تدعيلك بعد ما تموت ...

يبقى تنفذ النصايح اللي قلتها ...

وان شاء الله ربنا هايوفقك ويحبب خلقه فيك ...

انا بجد فرحان أوي اني بكتب الكلام ده ...

وبقول للناس كلها قد ايه الراجل ده عظيم ...

وفرحان أوي اني بادعيله يوماتي ...

الراجل بصراحة يستحق أكثر من ذلك بكثيييييييييييييير ...

بس ربنا يقدرني واقدر أرد له ولو جزء بسيط مما فعله معي

وحابب أقولكم ان الآن وقت كتابة هذا الكلام الساعة 10:15 مساء ..

في هذا الوقت ... هو نفس الوقت اللي ردت روح هذا الرجل الطيب إلى بارئها .....

وانا مش قادر أعبر عن احساسي ..

بالفرحة لأني بكتب الكلام ده واعرفكم بالراجل ده

واني فاكره دايما ولا بالحزن لفقده لانه كان نعم الأب والأخ والصديق ....

فيا رب ارحمه برحمتك ..

وادخله فسيح جناتك ...

واقبله عندك بين الأنبياء والصديقين والشهداء

ويا رب قدرني أكمل مسيرة هذا الرجل في الدعوة

ياااااااا رب .... يااااااااا رب

يا رب آميييييييييييييييييييييييييييييييييين

وأستحلفكم بالله .. اللي يقرأ هذا الكلام ...

يدعو لهذا الرجل .... فهو والله يستحق ذلك وأكثر

أخيرا ...

لن أنساك يا خولي ... لن أنساك ما حييت

سأظل أذكرك بين ... الدجى والناس كلهم

فيا رب الحقني به ... على خيرٍ وهدى وثبات

وخير ختام السلام

فسلام الله عليكم وبركاته ،،،،


الأربعاء، 16 يوليو، 2008

ماليش في السياسة - الجزء التاني والأخير - وحاجات تانية

طيب يا جماعة في الجزء الاول انا تكلمت عن ملابسات الموضوع والظروف اللي ممكن تخلي كل مننا نقول الكلام ده ..... المرة دي انا هاقول رأيي في الموضوع وما هو الحل ؟؟
أكيد يا جماعة كلنا متفقين ان دي مشكلة موجوده في الشعب ولازم نحلها ... ولازم برده نكون عارفين ان الحل مش هيكون في أي من الجماعات الموجوده على الساحة ..... الحل لا بد أن يكون بيد الشعب .... لازم الشعب هوه اللي يحل ... طيب يحل ازاي ؟؟
انا هاقول رأيي ... ويا ريت تقولوا آرائكم ...

أولا :: الحل لا يكمن في ان احنا نطلب من الناس اللي بتخاف من المظاهرات انها لازم تطلع في المظاهرات .... لأ مش شرط ..... اللي مش عايز يطلع في المظاهرات ما يطلعش .... بس فيه في أيده حاجات تانية ممكن يعملها ... ممكن يتكلم مع الناس في ذلك ... ويفهمهم ان الوضع ده غلط ... وانا احنا مش عاجبنا .

ثانيا :: الحل برده مش المظاهرات اللي بتطلع الناس فيها تكسر المحلات والعربيات ..... يعني لما نطلع نكسر في الشوراع هل حلت القضية .... أكيد لأ ؟؟ .... بل احنا سببنا أذى لناس قد يكون لقمة عيشة في المحل اللي اتكسر .

ثالثا :: الحل في مظاهرات سلمية ... تبين الاحتجاج والاعتراض فقط لا غير .... ولا شئ آخر
رابعا :: الحل برده بيكون في ان كل واحد لازم يوضح للناس اللي حواليه ان احنا لينا حقوق بسيطة جدا لازم ناخذها ... مثال ذلك : الشرطي اللي في الشارع ده .. المفروض انه موضوع لخدمة الشعب مش التسلط عليهم وانه يتخصص يقرفهم ... لو الشرطي ده لقى الناس كلها ضده وان اللي بيعمله ده غلط ... أكيد هايتغير ... لانه مش بيعمل اللي بيعمله الا عشان هوه شايفنا ساكتين ... مش بنتكلم .

انا قلت في الأول ان عندنا حاجات تانية في البوست ده ....

وهي : تاج وصلني من الاخت سارة من مدونتها .... وبتقول لازم أجاوب فأنا جاوبت واسيبكم معاه بقه

س1 : أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
أحلام تخص الماضي وهي :
1- كان نفسي دايما الاقي حد يفهمني صح .... الناس كلها كانت بتفهمني غلط ..... ومش كنت بعرف اتعامل معاهم
2- كان نفسي دايما ألاقي صاحب بجد ..... ولغاية دلوقتي مش لاقي حد.
3- كان نفسي دايما اني أسيب البيت بتاعنا ...... وفعلا حصل وسبته ..... بس كانت تجربة صعبة جدا ... والحمد لله عدت
ده اللي فاكره الآن ..... وكفاية


س2 : أذكر خمس أحلام على الاقل ..تخص مستقبلك؟
1- بحلم بدولة اسلامية تعود مرة آخرى لتعيد للاسلام مجده.
2- نفسي اعمل أكبر مركز طب اسنان عالمي ... زي مغربي كده.
3- بحلم في زوجة صالحة ... تفهمني صح ... وتعوضني عن حاجات كتير فقدتها .
4- نفسي بجد أشوف مصر حرة ومستقرة.



س3 :أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا؟؟
في حياتي ... نفسي يكون الأستاذ محمد الخولي الله يرحمه موجود معايا وكمان واحد صاحبي من زمان اسمه مصطفى ... بس تفرقنا واحنا في تانية ابتدائي وحتى الآن مش عارف له طريق .... نفسي يرجع في حياتي من تاني ... يمكن يكون صاحب بجد .

أما في حياة أبنائي ... نفسي والدي يكون متواجد معاهم ...



س4: أعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟
1- الاستاذ محمد الخولي رحمه الله
2- أختي الكبيرة
3- أبو علاء ... صاحب مدونة جمعاوي


س5 : لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟
مش هابطل ... مش هاسكت ... مش هاتنازل
ولأصدقائي : أحبوني كما احببتكم
و أخيرا ..... الاسلام هو الحل .. لكل ما نحن فيه ... ولن ابتغي العزة في غير الاسلام


س6 : ما هو هدفك فى الحياة ؟؟
هدفي هو الوصول لأعلى المراتب العالمية سواءا علمية أو غيرها
وذلك لتغيير فكرة الاسلام السيئة الموجودة عند بعض الناس


"إن شاء الله بكرة هيكون أحسن من النهارده"
س6 : هل تصدق هذه المقولة ؟؟ و لماذا ؟؟
لأ .... لأ أصدق هذه المقولة بتاتا ... فانا مقتنع ان بكره اسوأ
فباخد في اعتباري ذلك وبعمل حسابي .. ان بكره اسوأ ... مش أحسن
وليه؟؟ ... لأن الغني بكره فقير ... والفقير بكره الغني
وانهارده انا مستريح بكره تعبان ... انهارده انا معافى بكره مريض
عشان كده بعمل حساب كل حاجه ...


س8 : من المغنى اللى بتحبه أوى و إيه أحلى أغنية ليه بتحبها ؟؟
انا الحمد لله بطلت الاغاني من فترة ومش ناوي أرجعلها ....
اما لو كان السؤال عن الأناشيد ... فانا بحب كل الاغاني الكويتية بشدة ... فيها معاني عظيمة دوما


س7 : أجمل مقولة سمعتها فى حياتك ؟؟
كتير هاقولكم شويه
بابا دايما بيقول :
السواقة ذوق وفن ... السواقة مش سرعة .... السرعة دي دوسة بنزين

- شكوت الى وكيع سوء حفظي فأرشدني إلى ترك المعاصي
- اذا لم تجد ما تحب ... حب ما تجد
- في الروح اصرار وفي أعماقنا أمل ... لا يعتري خطواتنا يأس ولا سأم


كفاية كده ... نشوف اللي بعدو



س9 : غزة" تمثل لك إيه فى حياتك ؟؟"
غزة بالنسبة لي .... مدينة فلسطينية ... جريحة ... تقع تحت جنح العدو الصهيوني يفعل بهم ما يشاء .... نسال الله لهم الجنة ... نفسي أعملهم حاجه بس مش عارف ..... بس بجد ... انا بشوف فيهم نماذج للصحابة .... ربنا يكرمهم يا رب



س10 : أعطى لإنتمائك لوطنك درجة من مائة ؟؟
معرفش ..... لأني بلا وطن ..... بس نفسي أشوف مصر حرة


س11 : لو تزوجت و أنجبت بنتين و ولدين أى الأسماء تختار لهم ؟؟
الولدين هم : (( مهند وعلي )) والبنتين هم : (( الصفا والمروة ))


س12 : عمرك غشيت فى أمتحان و انت صغير ؟؟
ليه بس الفضايح دي ... للأسف نعم والواحد مكنش مدرك انها خيبة ..... بس ده قبل ما ربنا يهدينا ..... ونسأل الله الهداية والثبات


س 13 :لو أتعرض عليك رشوة كبيرة و انت فى زنقة ماليه هتعمل إيه ؟؟
عرضوا على الشهيد سيد قطب الاعفاء من الاعدام في عهد عبد الناصر مقابل ان يعتذر لعبد الناصر ولكن الشهيد رفض ... بالرغم من انه لو فعل ذلك لن يكون في حرج شرعي ولا أي شئ ... بل ان ذلك مباح له .... ولكنه رفض


لن أفعل أكثر ما فعله هذا الشهيد رحمه الله .... سأرفض ولو في ذلك قطع رقبتي


س14 : قول 3 صفات ب 3 كلمات بس توصف بيهم شخصيتك ؟؟
طيب ... حساس ... جااااد


س 15 : برضه بكلمة واحدة ايه اهم صفة عايزها في شريك حياتك؟؟
طيب همه شرطين لا يتجزؤون عن بعضهم البعض
أولا : الالتزام بدين الله وحسن الخلق .. معينة على الطاعة
ثانيا : مرحة ... رومانسية ... غريبة الأطوار ... يعني مش عادية ... طيبة


س16 : ايه المجال اللى غير دراستك وشايف نفسك فيه قوي؟؟
مجال الحاسب الآلي


س17 : بتحب السفر؟
هههههههه
انا اساسا حياتي كلها سفر ...... انهارده رايح ... وبكره راجع
مش ورايا حاجه غيره ... واللي عايز يصدق انا السنة دي سافرت فيها خمس مرات لأماكن مختلفة .... واللي عايز يصدق كمان ... انا لسه راجع من السفر الفجر انهارده ....
طبعا بحب السفر ... حاجه ممتعه جدا


س 18 : طب دلوقتى حالا ايه المكان اللى نفسك تكون فيه؟
طيب ... دلوقتي حالا .. نفسي أروح البحر



وفي الختام بشكر أختي سارة على التاج الطويل ده ....


ربنا يبارك في حضرتك ويجعلك خادمة للإسلام بحق ....
-_-_-_-_-_-_-_-_-_-


كفاية كده لأني تعبت من التاج الطويل ده ... وانتظروا الوبست القادم ... حاجه جامده ... ان شاء الله تعجبكم ،،،،