الثلاثاء، 1 يوليو 2008

مش فاهم حاجه خالص

مش عارف ومش فاهم ومش قادر أفهم أي حاجه..

ده شعوري بقالي تلاتة أيام .... مش فاهم لغاية امته هنفضل كده ... وانا مسافر كنت حاسس اني هاستريح لما اسيب مصر وابعد عنها ولكن اللي بيتضحلي إني بحبها ... ومش قادر على بعدها ... ليه ؟؟ ... ده حتى أنا مش مستريح فيها ... مش قادر أفهم.

كل يوم بتظهر امامي مواقف تخليني أكره حكومتنا الرشيدة .... رشيدة ؟؟ رشيدة مين يا عم ... خدوا الموقف ده ... لسه طازة أهون ... من شويه كنت بكلم واحد صاحبي معايا في الدفعة .. بيحكيلي عن النتيجة وكده .... قالي انا كنت جايب جيد قبل التظلم وبعد التظلم جبت امتياز ... اسمعوا الحكاية زي ما قالها وقولولي ايه رأيكم ؟؟

في علم النبات ... كان جايب في الورقة 42 درجة .... والملاحظ نقلها في الكشف 24 درجة
في الانجليزي ... فيه فرق في جمع الدرجات 18 درجة ... احم احم . (( اللي بيجمع ده ساقط حساب ولا ايه ))
في الكيمياء ... الدكتور جمعله أقل درجات للأسئلة .. بدل ما يجمعلوا أعلى درجات للأسئلة
في الحيوان ... بعد التظلم طلعلوا 5 درجات مش واخدهم
في الفيزياء ... اخونا كان حالل فرع كامل ومقفله .. ولم تجمع له الدرجة
طبعا كل ده بعد ما الاخ دفعلهم 353 جنيه تمن التظلم

انا عايز اعلق على اللي حصل ده
في مادة النبات ... معلهش الدكتور مش كان شايف ... بس هوا لو هايقبض المرتب هايشوف كويس جدا
في مادة الانجليزي ... معلهش أصل الدكتور ساقط حساب ... عشان يطلعلوا فرق 18 درجة
في مادة الكيمياء ... الدكتور له عذره برده ... دي مادته وهو حر .. ان شاء الله يسقطه
في مادة الفيزياء ... نفسي أفهم احنا عندنا ثلاث فروع والراجل مقفل الفرع اللي درجته ما اتجمعتش .... ليه يحصل كده ؟؟

بس العيب مش عليهم ... العيب على اللي وصلهم للمكان ده وخلاهم يدرسوا في الجامعة.
وبعدين هوه انا عشان آخد حقي لازم ادفعلهم فلووووووس .... يعني هوه كل حاجه في البلد خلاص وقفت على الفلوس
ولكن ما بيدي أن أقول غير ... حسبي الله ونعم الوكيل ... حسبنا الله في الظالمين

صحيح ... نسيت أقول ... انا لو عملت تظلم بقه ودفعت الفلوس وخدت معايا واسطه كمان ... هاطلع الأول على الدفعة مش كده ولا ايه ؟؟

هناك تعليقان (2):

شهيدة الأقصى يقول...

السلام عليكم ورحمة الله وبركاته
الموقف اللي في البوست ده مش جديد واكيد سمعنا زيه كتير وكويس إنه عرف ياخد حقه بس للأسف كان لازم يدفع عشان ياخده
لان كل حاجة بقت ماشية بالواسطة او الفلوس
يبقى انت اكيد اكيد في مصر
بس هي بقت سياسة عامة من اصغر موظف لاكبر موظف
بقى منطق عند كل الناس انك لازم تدفع قبل ما تطلب اي حاجة وحتى لو ممن حقك الحصول عليها من غير حاجة لان ده حقك
وربنا يستر علينا
عالعموم دي اول زيارة ليا للمدونة دي وعجبني البوست ده بجد

شهيدة الأقصى

همسات شاب يقول...

جزاكم الله خيرا أختي شهيدة الأقصى على مرورك الجميل

والموقف ده ... مش أقدر اقول غير .. حسبنا الله ونعم الوكيل وخلاص

حضرتك نورتينا في المدونة

وأسعدني مرورك بشدة