السكة الحديد وكم لها من ذكريات معي
وبطبيعة ان القطورة مش بتيجي في معادها
وآخرها انهارده .. القطر متأخر كالعادة
فواقف .. ولمحت بعيني قضيبي السكة الحديد
بيلمعوا أوي .. كل مرة أشوفهم بيبقى نفسي ألمسهم
مش عارف ليه .. بس هوه احساس وخلاص
عموما خلونا في السكة الحديد .. وطبعا تغيراتها الجديدة
والخط العريض المكتوب في كل المحطات
وعدت الهيئة فأوفت
وكاتبين قطار سريع كل ساعة
ومميز كل نصف ساعة
وطبعا الحقيقة ليست كذلك
فيا ريتها لا وعدت ولا أوفت
المهم .. كم أقضي من أوقات على رصيف السكة الحديد
يا اما بسمع أناشيد او قرآن .. وأحيانا بقرأ في كتاب
أو بفضل باصص للقضبان اللي بتلمع
اللي بحس دايما انها وراها أسرار كبيرة جدا
مش عارف ليه
انهارده بقى وعلى عادتي
وقفت أنظر للقضبان اللامعة
وخطر ببالي بعض الأفكار
كم من مرة حملت تلك القضبان قطارات
وما تحمله القطارات من كل أنواع البشر
الغني والفقير .. الطالب والعالم .. والجاهل
حملت كل أنواع البشر في تلك المقطورات
فهل في يوم أذعنت تلك القضبان عن حمل القطار
هل في يوم توقفت عن العمل .. وطلبت أجازة
طبعا .. أيام كتير تعطلت وعطلت مسير القطارات
بس ليه ؟؟ .. عشان مفيش اهتمام .. مفيش متابعة
ولكن ان اهتممنا بها .. عملت بكل كفاءة ..
كذلك القطارات والكراسي والأرفف
تعاملوا مع جميع البشر .. كم كسروا فيها وعاملوها بعنف ؟؟
فما كانت ردة فعلهم .. اتكسروا .. وتوقفوا عن العمل
طبعا .. ما همه جماد .. ايه اللي هايحصل فيهم يعني ؟؟
هايزعلوا ولا هايتأمصوا ؟؟!!
طبعا لأ ... ولكنهم توقفوا عن أداء مهمتهم
طيب ما تيجوا بقى نحط نفسنا مكانهم
وباعتبار انهم جماد واننا بني آدمين
فلكل منا ردة فعل تناسب طبيعته
يعني مثلا احنا اهوه دولقت بنتعامل مع ناس كتير
منهم الكويس ومنهم الوحش .. وبنتأثر بناس ونزعل من ناس
طيب ردة فعلنا ايه ؟؟
خليكوا فاكرين ردة فعل الجماد ايه ؟؟
احنا هانتئمص ونزعل وناخد جنب من اللي زعلنا
اممممممممممممممممممممم
طيب .. ايه الجديد بقى ؟؟
فرقت ايه عن الجماد .. اللي اتكسر لمجرد معاملة الناس السيئة
طيب ما انته اتكسرت انته كمان .. بس بشكل مختلف
يعني مش واجهت المشكلة .. ولا عرفت تتصرف معاها
انته تصرف تصرف الجماد بالظبط !!
هاتقول لأ .. وانا مالي ومال الجماد ؟؟
هاقولك يا حبيبي انته والجماد واحد
الجماد مقدرش يتعامل بمرونة مع الإساءة
مقدرش يتحملها .. بدأ يتكسر .. بدأ يتهالك
طيب انته بقى عملت ايه ؟؟
ما هوه انته متعاملتش بمرونة برده
انكسرت داخل نفسك ..
يبقى مفرقتش حاجه عن الجماد
لا .. انته لازم تحتوي الناس كلها
أكيد هنقابل الوحش والحلو
بس شطارتك انته بقى اللي تخليك تقدر تحتويهم
مش تزعل منهم
شطارتك تخليك قدوة ليهم
مش تاخد جنب وتركن
شطارتك هاتجيبلك جبال من الحسنات وانت لا تدري
بدلا من جبال السيئات من جراء قطيعة الناس
طيب انا محتاج ده ليه ؟؟
هاقولك بقى .. لأن كل واحد فينا بيأدي دور
الجماد كان قضبان أو كرسي أو رف بيأدي الدور اللي عليه
احنا كمان كده .. كل واحد ليه دور بيأديه
بس يا ترى ..
هل بنأديه صح ؟؟
هل بتأديه صح ؟؟
هل بتأديه صح ؟؟
ولا بتنكسر من أول جفاء في التعامل
من أول شوكة في الطريق تواجهك ؟؟
من أول عقبة .. بترجع ؟؟
بس كده
هناك تعليقان (2):
انا الاولى
والله كلام اقل مايقال في حقه انه رائع لا والله هوه اكتر من رائع بجد جميل
سبحان الله قد ايه لسه في ناس كويسة لما يجي في بالها موضوع كبير وعميق من لحظة تامل صغيرة في قضبان الحديد
وان كان يدل الكلام ده على شئ فانه يدل على فكرك السليم الواسع مشاء الله تبارك الله
ربنا يجعلنا من البيقابلوا الناس بمرونة ولين ومش بيتكسروا زي الجماد ولا بيتجرفوا مع تيار المعاصي والذنوب ونكون صامدين في وشها لحد ماتتغير باذن الله
تقبل خالص تحياتي وتقديري
إرسال تعليق