قــــف .... أعد حسابـــاتك

ها قد مرعام .... وسيتلوه عام وعام

مررت بأيام جميلة .... وأيام مريرة

استمتعت بأيام ... وكرهت أياما

ونسيت في كل ذلك ؟؟

هل هذا الطريق الذي تريده

أم لا

نسيت ونسيت ونسيت حتى مر عام كامل دون ان تشعر به

فأين أنت الآن ... هل أعدت التفكير .... ونظرت إلى الطريق



هل هو الطريق المناسب ... أم أنك تريد التغيير .. إذا أردت

فانتبه لأن أمامك مخرج ... أعد تفكيرك .. وان كان طريقك خاطئ

فالحق المخرج ... فإنه قد يكون المخرج الأخير في طريقك الطويل

طريقك طوييييييييييييل والزاااااااااااااد قليييييييييل

أخي الكريم : توقف الآن وأعد اختيار طريقك ..... واختر زادك

فكما ترى الطريق طويل .... والزاد لا يكفي لهذا الطريق الطويل

ولكن اغتنم أول فرصة تأتي أمامك ... فهي قادمة امامنا .. لا تدعها تفوت


أما الطريق فهو حياتنا اليومية .. التي نمر بها كل يوم

وأما المخرج .. فهو شهر رمضان .. فهو مخرج لنا من كل ما نحن فيه

وأما الزاد .. فهو الصديق اختر لك صديقا حسنا ... يعينك لا يفسدك

-_-_-_-_-_-_-_-_-

وأخيرا .... رمضان كريم

وكل عام وأنتم بخير بمناسبة حلول هذا الشهر الكريم ،،،

في ذكراك ما دمنا .... لن ننساك أبدا

السلام عليكم ورحمة الله وبركاته ،،،

اتأخر البوست ده أوي ... بس انا كنت متعمد ذلك عشان انهارده يوم لا يمكن اني انساه ابدا

انهارده كم ؟؟

14 -8 - 2008 م .... يا الله ... الايام بتعدي بسرعة أوي

عارفين مين ده ؟؟

مين يا ترى ... مين ... مين ...

أقولكم أنا مين !!

ده الأستاذ محمد الخولي الله يرحمه

أعظم معلم عرفته في حياتي

وانا جاي انهارده أكلمكم عنه .. مش هاكلمكم

هاقول حاجات صغننة أوي كده .... بس ان شاء الله تستفيدوا منها

انا منقطع عن التدوين منذ شهر ...

مش عارف السبب ... بس مكنتش عايز أكتب حاجه

دايما في بالي الأستاذ محمد ...

فقلت لن أكتب قبل يوم 14-8 .. هاتقوليلي ليه ؟؟

لأنه اليوم اللي توفى فيه .... يوم 14 -8 -2007 م

يااااااااه .. السنة عدت بسرعة أوي ..

انا لسه فاكره وهوه معانا .. شوفوا الراجل توفي

وعدت سنة على وفاته .... ياااااااااه بجد مش مصدق

أول حاجه عايز أقولها .. فوقوا لنفسكم ..

الموت مش بعيد عنكم وممكن في أي وقت ..

لا تتغر بصحتك ووسامتك

ده انته أقرب للموت منهم ... فيا جماعة اشحذوا الهمم ..

بجد مين كان يصدق اننا ممكن بين يوم وليلة نفقد الأستاذ محمد

محدش والله ؟؟ .... بس اهوه حصل .. يبقى احنا نتعظ بقه ،،،

الراجل ده عظيم جدا ... انا مش قادر أنساه ... وتقريبا كل يوم بفتكره ...

رغم انه مش مشهور ولا حاجه ...

بس هوه كان مسيطر على قلوب الجميع ...

والله لو كان هيقول لحد ارمي نفسك في البحر ..

كان يرمي نفسه ... تخيلوا .. بنحبه قد ايه ؟؟

انا بقالي سنة بتذكره يوميا ... مش قادر أنساه أبدا ...

في كل المواقف اللي بمر بيها بافتكره ..

بافتكر النصايح .. بافتكر الحب والود

ودي ثاني حاجه عايز أقولها ... لازم تكون عضو مؤثر في اللي حواليك ..

بأسلوبك اللطيف وحبك للجميع ...

بحفاظك على صلاتك ..

بتفوققك في دراسته ...

ده كله يخلي الناس تحبك ...

وتقدر تكون مكان الأستاذ محمد ..

الناس تذكرك حتى بعد وفاتك

مش حابب تكون كده ولا ايه ؟؟؟ ....

متحبش الناس تدعيلك بعد ما تموت ...

يبقى تنفذ النصايح اللي قلتها ...

وان شاء الله ربنا هايوفقك ويحبب خلقه فيك ...

انا بجد فرحان أوي اني بكتب الكلام ده ...

وبقول للناس كلها قد ايه الراجل ده عظيم ...

وفرحان أوي اني بادعيله يوماتي ...

الراجل بصراحة يستحق أكثر من ذلك بكثيييييييييييييير ...

بس ربنا يقدرني واقدر أرد له ولو جزء بسيط مما فعله معي

وحابب أقولكم ان الآن وقت كتابة هذا الكلام الساعة 10:15 مساء ..

في هذا الوقت ... هو نفس الوقت اللي ردت روح هذا الرجل الطيب إلى بارئها .....

وانا مش قادر أعبر عن احساسي ..

بالفرحة لأني بكتب الكلام ده واعرفكم بالراجل ده

واني فاكره دايما ولا بالحزن لفقده لانه كان نعم الأب والأخ والصديق ....

فيا رب ارحمه برحمتك ..

وادخله فسيح جناتك ...

واقبله عندك بين الأنبياء والصديقين والشهداء

ويا رب قدرني أكمل مسيرة هذا الرجل في الدعوة

ياااااااا رب .... يااااااااا رب

يا رب آميييييييييييييييييييييييييييييييييين

وأستحلفكم بالله .. اللي يقرأ هذا الكلام ...

يدعو لهذا الرجل .... فهو والله يستحق ذلك وأكثر

أخيرا ...

لن أنساك يا خولي ... لن أنساك ما حييت

سأظل أذكرك بين ... الدجى والناس كلهم

فيا رب الحقني به ... على خيرٍ وهدى وثبات

وخير ختام السلام

فسلام الله عليكم وبركاته ،،،،

ماليش في السياسة - الجزء التاني والأخير - وحاجات تانية

طيب يا جماعة في الجزء الاول انا تكلمت عن ملابسات الموضوع والظروف اللي ممكن تخلي كل مننا نقول الكلام ده ..... المرة دي انا هاقول رأيي في الموضوع وما هو الحل ؟؟
أكيد يا جماعة كلنا متفقين ان دي مشكلة موجوده في الشعب ولازم نحلها ... ولازم برده نكون عارفين ان الحل مش هيكون في أي من الجماعات الموجوده على الساحة ..... الحل لا بد أن يكون بيد الشعب .... لازم الشعب هوه اللي يحل ... طيب يحل ازاي ؟؟
انا هاقول رأيي ... ويا ريت تقولوا آرائكم ...

أولا :: الحل لا يكمن في ان احنا نطلب من الناس اللي بتخاف من المظاهرات انها لازم تطلع في المظاهرات .... لأ مش شرط ..... اللي مش عايز يطلع في المظاهرات ما يطلعش .... بس فيه في أيده حاجات تانية ممكن يعملها ... ممكن يتكلم مع الناس في ذلك ... ويفهمهم ان الوضع ده غلط ... وانا احنا مش عاجبنا .

ثانيا :: الحل برده مش المظاهرات اللي بتطلع الناس فيها تكسر المحلات والعربيات ..... يعني لما نطلع نكسر في الشوراع هل حلت القضية .... أكيد لأ ؟؟ .... بل احنا سببنا أذى لناس قد يكون لقمة عيشة في المحل اللي اتكسر .

ثالثا :: الحل في مظاهرات سلمية ... تبين الاحتجاج والاعتراض فقط لا غير .... ولا شئ آخر
رابعا :: الحل برده بيكون في ان كل واحد لازم يوضح للناس اللي حواليه ان احنا لينا حقوق بسيطة جدا لازم ناخذها ... مثال ذلك : الشرطي اللي في الشارع ده .. المفروض انه موضوع لخدمة الشعب مش التسلط عليهم وانه يتخصص يقرفهم ... لو الشرطي ده لقى الناس كلها ضده وان اللي بيعمله ده غلط ... أكيد هايتغير ... لانه مش بيعمل اللي بيعمله الا عشان هوه شايفنا ساكتين ... مش بنتكلم .

انا قلت في الأول ان عندنا حاجات تانية في البوست ده ....

وهي : تاج وصلني من الاخت سارة من مدونتها .... وبتقول لازم أجاوب فأنا جاوبت واسيبكم معاه بقه

س1 : أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
أحلام تخص الماضي وهي :
1- كان نفسي دايما الاقي حد يفهمني صح .... الناس كلها كانت بتفهمني غلط ..... ومش كنت بعرف اتعامل معاهم
2- كان نفسي دايما ألاقي صاحب بجد ..... ولغاية دلوقتي مش لاقي حد.
3- كان نفسي دايما اني أسيب البيت بتاعنا ...... وفعلا حصل وسبته ..... بس كانت تجربة صعبة جدا ... والحمد لله عدت
ده اللي فاكره الآن ..... وكفاية


س2 : أذكر خمس أحلام على الاقل ..تخص مستقبلك؟
1- بحلم بدولة اسلامية تعود مرة آخرى لتعيد للاسلام مجده.
2- نفسي اعمل أكبر مركز طب اسنان عالمي ... زي مغربي كده.
3- بحلم في زوجة صالحة ... تفهمني صح ... وتعوضني عن حاجات كتير فقدتها .
4- نفسي بجد أشوف مصر حرة ومستقرة.


س3 :أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا؟؟
في حياتي ... نفسي يكون الأستاذ محمد الخولي الله يرحمه موجود معايا وكمان واحد صاحبي من زمان اسمه مصطفى ... بس تفرقنا واحنا في تانية ابتدائي وحتى الآن مش عارف له طريق .... نفسي يرجع في حياتي من تاني ... يمكن يكون صاحب بجد .

أما في حياة أبنائي ... نفسي والدي يكون متواجد معاهم ...


س4: أعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟
1- الاستاذ محمد الخولي رحمه الله
2- أختي الكبيرة
3- أبو علاء ... صاحب مدونة جمعاوي


س5 : لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟
مش هابطل ... مش هاسكت ... مش هاتنازل
ولأصدقائي : أحبوني كما احببتكم
و أخيرا ..... الاسلام هو الحل .. لكل ما نحن فيه ... ولن ابتغي العزة في غير الاسلام


س6 : ما هو هدفك فى الحياة ؟؟
هدفي هو الوصول لأعلى المراتب العالمية سواءا علمية أو غيرها
وذلك لتغيير فكرة الاسلام السيئة الموجودة عند بعض الناس


"إن شاء الله بكرة هيكون أحسن من النهارده"
س6 : هل تصدق هذه المقولة ؟؟ و لماذا ؟؟
لأ .... لأ أصدق هذه المقولة بتاتا ... فانا مقتنع ان بكره اسوأ
فباخد في اعتباري ذلك وبعمل حسابي .. ان بكره اسوأ ... مش أحسن
وليه؟؟ ... لأن الغني بكره فقير ... والفقير بكره الغني
وانهارده انا مستريح بكره تعبان ... انهارده انا معافى بكره مريض
عشان كده بعمل حساب كل حاجه ...


س8 : من المغنى اللى بتحبه أوى و إيه أحلى أغنية ليه بتحبها ؟؟
انا الحمد لله بطلت الاغاني من فترة ومش ناوي أرجعلها ....
اما لو كان السؤال عن الأناشيد ... فانا بحب كل الاغاني الكويتية بشدة ... فيها معاني عظيمة دوما


س7 : أجمل مقولة سمعتها فى حياتك ؟؟
كتير هاقولكم شويه
بابا دايما بيقول :
السواقة ذوق وفن ... السواقة مش سرعة .... السرعة دي دوسة بنزين

- شكوت الى وكيع سوء حفظي فأرشدني إلى ترك المعاصي
- اذا لم تجد ما تحب ... حب ما تجد
- في الروح اصرار وفي أعماقنا أمل ... لا يعتري خطواتنا يأس ولا سأم


كفاية كده ... نشوف اللي بعدو


س9 : غزة" تمثل لك إيه فى حياتك ؟؟"
غزة بالنسبة لي .... مدينة فلسطينية ... جريحة ... تقع تحت جنح العدو الصهيوني يفعل بهم ما يشاء .... نسال الله لهم الجنة ... نفسي أعملهم حاجه بس مش عارف ..... بس بجد ... انا بشوف فيهم نماذج للصحابة .... ربنا يكرمهم يا رب


س10 : أعطى لإنتمائك لوطنك درجة من مائة ؟؟
معرفش ..... لأني بلا وطن ..... بس نفسي أشوف مصر حرة


س11 : لو تزوجت و أنجبت بنتين و ولدين أى الأسماء تختار لهم ؟؟
الولدين هم : (( مهند وعلي )) والبنتين هم : (( الصفا والمروة ))


س12 : عمرك غشيت فى أمتحان و انت صغير ؟؟
ليه بس الفضايح دي ... للأسف نعم والواحد مكنش مدرك انها خيبة ..... بس ده قبل ما ربنا يهدينا ..... ونسأل الله الهداية والثبات


س 13 :لو أتعرض عليك رشوة كبيرة و انت فى زنقة ماليه هتعمل إيه ؟؟
عرضوا على الشهيد سيد قطب الاعفاء من الاعدام في عهد عبد الناصر مقابل ان يعتذر لعبد الناصر ولكن الشهيد رفض ... بالرغم من انه لو فعل ذلك لن يكون في حرج شرعي ولا أي شئ ... بل ان ذلك مباح له .... ولكنه رفض


لن أفعل أكثر ما فعله هذا الشهيد رحمه الله .... سأرفض ولو في ذلك قطع رقبتي


س14 : قول 3 صفات ب 3 كلمات بس توصف بيهم شخصيتك ؟؟
طيب ... حساس ... جااااد


س 15 : برضه بكلمة واحدة ايه اهم صفة عايزها في شريك حياتك؟؟
طيب همه شرطين لا يتجزؤون عن بعضهم البعض
أولا : الالتزام بدين الله وحسن الخلق .. معينة على الطاعة
ثانيا : مرحة ... رومانسية ... غريبة الأطوار ... يعني مش عادية ... طيبة


س16 : ايه المجال اللى غير دراستك وشايف نفسك فيه قوي؟؟
مجال الحاسب الآلي


س17 : بتحب السفر؟
هههههههه
انا اساسا حياتي كلها سفر ...... انهارده رايح ... وبكره راجع
مش ورايا حاجه غيره ... واللي عايز يصدق انا السنة دي سافرت فيها خمس مرات لأماكن مختلفة .... واللي عايز يصدق كمان ... انا لسه راجع من السفر الفجر انهارده ....
طبعا بحب السفر ... حاجه ممتعه جدا


س 18 : طب دلوقتى حالا ايه المكان اللى نفسك تكون فيه؟
طيب ... دلوقتي حالا .. نفسي أروح البحر



وفي الختام بشكر أختي سارة على التاج الطويل ده ....

ربنا يبارك في حضرتك ويجعلك خادمة للإسلام بحق ....

-_-_-_-_-_-_-_-_-_-

كفاية كده لأني تعبت من التاج الطويل ده ... وانتظروا الوبست القادم ... حاجه جامده ... ان شاء الله تعجبكم ،،،،

ماليش في السياسة - الجزء الأول -

كلمة بنسمعها كتير من ناس كتير

ولكن هل أحدكم تسآآئل ليه الناس بتقول كده ؟؟

انا من رأيي : انهم خايفيين من الحكومة أو انهم فعلا الموضوع مش بتاعهم - بمعنى انه مش بيعرفها أو مش بيتابعها ( مش عارف أوصلها ازاي ) مش من اهتماماته -

مش لاقي ليهم تالت خالص ..

هيه دي الأسباب المقنعة بالنسبة لي على الأقل عشان يقولوا كده

....المهم ...... كلنا متفقين أن الدين والدولة الاتنين واحد ولا يمكن أن يتجزأوا عن بعضهم مش ده اللي عايز اقوله .....

عايز اوصلكم حاجه تانية السببين اللي قلتهم ... هاخد واحد منهم واكلم عنه والتاني مش هيفيد اساسا الكلام فيه.. وده السبب التاني

انا هاتكلم عن السبب الأول ...

انا بسمع الناس بتقول ::

(( خايف من الحكومة )) ... (( يا عم عندي عيلين أربيهم )) ... (( وأنا مالي همه أحرار مع بعضيهم )) .... (( طالما اني عايش وكويس اتكلم ليه في الموضوع ده؟؟ )) ....كلام كتير بنسمعه من الناس ... بس انا عندي رد على الكلام اللي فات

1- خايف من الحكومة ليه؟؟ ..... (( كانت ربنا وفي ايديها الجنة والنار ))


2- يا عم عندي عيلين عايز أربيهم!! ..... (( وهل تربية الأولاد بالشرب والأكل بس ... طيب انا اعرف واحد دخل السجن سياسي ولما طلع بيحلفلي انا عمري ما شفت ولادي رجالة زي ما شفتهم وانا في السجن ويمكن اتعلموا حاجات كتير بقالي سنين بحاول ازرعها فيهم ........ ايه رأيك في الكلام ده يا اللي عايز تربي عيالك ؟؟!! ))


3- وأنا مالي همه أحرار مع بعضيهم ليه يا ريس !! .... (( هيا كانت بلدهم لوحدهم ... دي بلدنا كلنا ومن حقنا نعيش فيها أحرار ))


4- طالما اني عايش وكويس اتكلم ليه في الموضوع ده؟؟ ..... (( مش عارف والله تتكلم ليه ؟؟ ... انته راجل شبعان والعملية زي الفل تتكلم ليه صحيح ؟؟ .... بس يا أخي من باب أن الساكت عن الحق شيطان أخرس ومن باب تعاونوا على البر والتقوى ... غير حاجات كتير ممكن اقولك عليها .. بس كفاية دول ))

بعد ما رديت عليهم ... عايز ادردش معاكم شويه بقى .... نفسي أفهم ليه الناس بتقول كده عايز اتفق معاكم برده اني احنا لا نتمنى الابتلاء ولا نريده أساسا ولكن لو لا قدر الله ربنا ابتلاني ... فانا لازم اصبر ..... وخليكم فاكرين الكلام ده .....مش شوية ناس بدبابير هيه اللي تغيرني عن مبدأي ؟؟ الحكومة مش بيدها رزقك يا أخي .... ولكن الله بيده الأرزاق .... طيب لو فضلنا ساكتين ...... مش هوه ده الحل أكيد !! ولا ايه ؟؟دي بلدنا ولازم نعيش فيها أحرار .... مش كل حاجه بيد أمن الدولة ومين أمن الدولة دول أصلا ..... دي ناس واخده دبلومات فنية أو ثانوية بـ 50 %وداخلة بواسطة كمان ....... وبيفهموهم مفاهيم خاطئة ... مش هاقولكم على الكلام ده ... انت أعلم مني به ؟؟

انا عندي كلام تاني عايز اقولك انتظروه في الجزء التاني .. ان شاء الله

وقولولي رأيكم في الكلام اللي مكتوب ده ... صح ولا غلط ؟؟ نتناقش يعني !!

واجبات تاني ..... ليه طيب ؟؟

يعني مش عارف اقول ايه ... واجب تاني .... انا ما صدقت أخلص .... بس قدر ومكتووووووووب

6 أسرار قد لا يكتشفها من يقابلك أول مرة ؟

1- اذكر اسم من طلب منك حل الواجب ؟
أخويا وحبيبي أحمد من مدونة أنا وصاحبي

2-اذكر القوانين المتعلقه بهذا الواجب ؟
مش فاهم السؤال ... يلا .. خلينا نشوف اللي بعده

3-تحدث عن 6 اسرار قد لا يكتشفها من يقابلك لاول مره ؟

طيب .... يعني ربنا بيستر علينا .... انتوا لازم تفضحونا

1- إني بسرح كتير في الكلام.

2- بمووووت في حاجه اسمها كمبيوتر.

3- عملي جدا .... ومش بحب الهزار وقت الجد.

4- نشيط جدا في الحاجات اللي على مزاجي بس،،،، أما اللي مش في مزاجي أو مش مقتنع بيها طبعا كسووول جدا.

5- ان انا طالب ... لسه.

6- ان لساني مولوتوف ... في الحق طبعا .

4- حول هذا الواجب الى سته مدونبن واذكر روابط مدوناتهم ؟

(1) مدونة جمعاوي ------> http://www.gam3awey.blogspot.com/

(2) مدونة اخواني حتى النخاع -----> http://ikhwangeeee.blogspot.com/

(3) مدونة أمين المكتبة -----> http://akhgam3a.blogspot.com/

(4) مدونة خواطري -----> http://mykhawater.blogspot.com/

(5) مدونة شهيدة -----> http://shaimoah.blogspot.com/

(6) مدونة عمر أفندي ----> http://omarafandy.blogspot.com/

5- ترك تعليق فى مدونات من ارسلت اليهم الواجب ليعلموا به ؟

تم ...بحمد الله

-_-*-_-*-_-*-_-*-_-*-_-*

جزاكم الله خيرا أخي أحمد على هذا الواجب

بس مش هاقولك في انتظار المزيد

ربنا يكرمك يا أحمد

وجوه مضيئة ووجوه بتحلم ببكره !!

وجوه مضيئة

ووجوه بتحلم ببكره

مش فاهم حاجه خالص

مش عارف ومش فاهم ومش قادر أفهم أي حاجه..

ده شعوري بقالي تلاتة أيام .... مش فاهم لغاية امته هنفضل كده ... وانا مسافر كنت حاسس اني هاستريح لما اسيب مصر وابعد عنها ولكن اللي بيتضحلي إني بحبها ... ومش قادر على بعدها ... ليه ؟؟ ... ده حتى أنا مش مستريح فيها ... مش قادر أفهم.

كل يوم بتظهر امامي مواقف تخليني أكره حكومتنا الرشيدة .... رشيدة ؟؟ رشيدة مين يا عم ... خدوا الموقف ده ... لسه طازة أهون ... من شويه كنت بكلم واحد صاحبي معايا في الدفعة .. بيحكيلي عن النتيجة وكده .... قالي انا كنت جايب جيد قبل التظلم وبعد التظلم جبت امتياز ... اسمعوا الحكاية زي ما قالها وقولولي ايه رأيكم ؟؟

في علم النبات ... كان جايب في الورقة 42 درجة .... والملاحظ نقلها في الكشف 24 درجة

في الانجليزي ... فيه فرق في جمع الدرجات 18 درجة ... احم احم . (( اللي بيجمع ده ساقط حساب ولا ايه ))

في الكيمياء ... الدكتور جمعله أقل درجات للأسئلة .. بدل ما يجمعلوا أعلى درجات للأسئلة

في الحيوان ... بعد التظلم طلعلوا 5 درجات مش واخدهم

في الفيزياء ... اخونا كان حالل فرع كامل ومقفله .. ولم تجمع له الدرجة

طبعا كل ده بعد ما الاخ دفعلهم 353 جنيه تمن التظلم

انا عايز اعلق على اللي حصل ده

في مادة النبات ... معلهش الدكتور مش كان شايف ... بس هوا لو هايقبض المرتب هايشوف كويس جدا

في مادة الانجليزي ... معلهش أصل الدكتور ساقط حساب ... عشان يطلعلوا فرق 18 درجة

في مادة الكيمياء ... الدكتور له عذره برده ... دي مادته وهو حر .. ان شاء الله يسقطه

في مادة الفيزياء ... نفسي أفهم احنا عندنا ثلاث فروع والراجل مقفل الفرع اللي درجته ما اتجمعتش .... ليه يحصل كده ؟؟

بس العيب مش عليهم ... العيب على اللي وصلهم للمكان ده وخلاهم يدرسوا في الجامعة.

وبعدين هوه انا عشان آخد حقي لازم ادفعلهم فلووووووس .... يعني هوه كل حاجه في البلد خلاص وقفت على الفلوس

ولكن ما بيدي أن أقول غير ... حسبي الله ونعم الوكيل ... حسبنا الله في الظالمين

صحيح ... نسيت أقول ... انا لو عملت تظلم بقه ودفعت الفلوس وخدت معايا واسطه كمان ... هاطلع الأول على الدفعة مش كده ولا ايه ؟؟